Млади уметници, беспрекорно музицирање и внимателно избран репертоар го задржаа вниманието на публиката на „Охридско лето“ синоќа, преку настапот на гудачкиот квинтет на Загрепската филхармонија  и солистот Александар Иванов во црквата „Света Софија“.

Загрепската филхармонија е редовен гостин на „Охридско лето“ , но секогаш настапува со различни камерни состави и секогаш носи нови возбудливи музички доживувања за фестивалската публика.

-Тоа и ми е целта, секогаш да носиме нешто поразлично и како камерен состав и програмски. Намерата е да отсвириме нешто убаво за публиката, но и да дојдат уметници од Хрватска и од регионот. И оваа година е пандемиска, ситуацијата е таква каква што е. Двајца од членовите откажаа, па за среќа, моите пријатели од Македонската филхармонија го дополнија нивното отсуство, рече познатиот македонски констрабасист со интернационална кариера Илин Диме Димовски, кој повеќе од една деценија е дел од оркестарот на Загрепската филхармонија.

Првото виолончело во Македонската филхармонија Паскал Краповски кој потекнува од семејство со долгогодишна музичка традиција истакна дека фестивалот „Охридско лето“ го чувствува како свој втор дом.

-Откако знам за себе сум врзан за „Охридско лето“, преку татко ми, преку Македонската филхармонија во минатото и денес, како дел од камерни ансамбли, така што фестивалот е мој втор дом. Вечерта ја започнавме со дело од нашиот композитор Дамјан Темков „Адаџо за Ана“, потоа ја продолживме со „Романските танци“  на барток со солистот Александар Иванов а вториот дел од концертот беше посветен на Дворжак со „Гудачки квинтет G-dur бр.2 оп.18/77, една преубава,, грандиозна музика и  пред се за нас  како изведувачи многу предизвикувачка од сите аспекти, рече Краповски.

Вчеравечер, не само што уживаше публиката, туку и хрватската виолинистка Дуња Бонтек која беше дел од камерниот состав што настапи на „Охридско лето“.

-Првпат сум во Македонија, и ова ми е прекрасно доживување, градот, луѓето, храната, колегите. Три дена имавме интензивни проби. Уживав во сѐ, рече Бонтек.

И за првата виолина во Македонската филхармонија, Владимир Костов, настапот на „Охридско лето“ секојпат е ново доживување, нов поттик.

-„Охридско лето“ за секој уметник е многу важен дел од неговата кариера. На фестивалот сум настапувал 15-тина години, како солист, но и во рамки на Македонската филхармонија и различни камерни состави. Секое свирење овде е сѐ поголем поттик и инспирација за понатамошното градење на нашата кариера, рече Костов.

Изминатата година, во екот на пандемијата кога музичарите беа спречени да концертираат, група членови на Загрепската филхармонија запазувајќи ги сите мерки и протоколи се собираа  и одржуваа проби за да не дозволат да престане музиката.