Меѓународниот саем на уметност „Ин Ситу“ – досега познат како Паратисима Скопје, го објави повикот за петтото издание кое ќе се одржи од 13 – 15 септември во Младинскиот културен центар, Скопје.

Како што наведува „Ин Ситу“, саемот кој досега претстави повеќе од 450 независни автори учесници кои потекнуваат од 39 земји, за својот прв јубилеј на своето петто издание оваа година се ре-брендира, станувајќи единствен независен саем на уметност од овој вид и размер во Македонија.

Повикот за учество во поставката за визуелни уметности, оваа година курирана од Ана Франговска, ќе биде отворен до 15 јули додека за учество во изложбената поставка за дизајн, под кураторство на Драган Христов – Лудус, може да се аплицира до 20 јули.

Саемската програма посветена на архитектурата ќе ја курираат Слободан Велески и Марија Мано Велевска правејќи внимателна селекција на странски предавачи кои во соработка со локалниот сектор ќе имаат можност да започнат значајна размена и соработки.

-Ин Ситу воспоставува комуникација помеѓу „локалното“ и „меѓународното“ по повеќе основи; пред сѐ во контекст на исклучителните и сериозни соработки вклучени во процесот на презентирање на поставките и програмата, потоа преку квалитетот на условите за изложување на независната сцена, а воедно и во однос на разновидната програма која не само што создава нова, многубројна публика и ја одржува љубопитноста, туку ја пласира македонската сцена како рамноправна со меѓународната. Во улога на културен катализатор, Ин Ситу го премостува  и нашиот локален јаз, обединувајќи  ги различностите во изразувањето, потеклото, познанствата, возраста, академската поткрепа и сите  други „формалности“ кои досега беа (зло)употребувани како изговор за професионална видливост и творечка препознатливост – вели Бојана Стојменовска, организатор на саемот за уметност „Ин Ситу“.

Тричлено жири ќе биде селектор на учесници кои ќе бидат наградени со независни изложби, учество на меѓународни саеми надвор од Македонија и можности за професионален развој и претставување.

Овогодишната програма на саемот ќе содржи три програмски единици: уметност, дизајн и архитектура, проследени со „off“-програма од предавања, работилници, проекции и музички настапи во соработка со национални и меѓународни автори и организации.