Пожар во модуларната болница во Тетово Фото: Принтскрин (видео - социјални медиуми)
Советот на општина Тетово прогласи тридневна жалост по вчерашната несреќа при пожарот во КОВИД центарот во Тетово во која загинаа вкупно 14 лица. Како што информираше утрово Министерството за здравство. Во КОВИД центарот за време на пожарот имало вкупно 26 пациенти, останатите 12 се на лекување во тетовската болница и се надвор од животна опасност. Нема настрадани здравствени лица, неколкумина се со полесни повреди, соопштуваат од Министерството за здравство, изразувајќи сочувство до семејствата на загинатите и длабоко жалење за страотната несреќа.

Откако изутринава се појавија информации во медиумите и на социјалните мрежи дека пропусти при градбата може да се причина за пожарот во модуларната болница во Тетово, Министерството за здравство информираше дека сите 19 модуларни КОВИД болници во државата, се типски објекти, градени по највисоки медицински и безбедносни стандарди.

„Модуларните КОВИД центри, вклучувајќи ја и болницата во Тетово се отворени после технички прием. При градбата на сите модуларни болници, вградените материјали се сертифицирани. Министерството за здравство информира дека КОВИД центарот во Тетово е проектиран со три влеза, ходниците се широки 2,4 метри а парапетите на прозорите се ниски во случај на евакуација. Во објектот не е користено дрво и запазени се сите други потребни елементи за заштита. При пуштање во употреба, направен е уреден технички прием. При градбата има уредно документирани записници за незначителни технички забелешки – силиконирање лајсни на подот, нивелирање на сифон во тоалет, продолжување на дел од олуците и сл. По овие барања, е постапено и истите се санирани пред пуштање во употреба и хоспитализација на пациенти. Овие документи ќе бидат доставени на увид на јавноста и медиумите уште денеска“, се вели во соопштението.

Министерството за здравство информира дека КОВИД центарот во Тетово ги поседува и сите потребни сертификати за заштита при несреќи.

„Апелираме да не се шпекулира со ваквите информации. Министерството за здравсто очекува експертите и истражните органи што побрзо да го истражат случајот за оваа страотна несреќа. Сите аспекти на случајот да бидат предмет на темелна и брза истрага и секако одговорност доколку истрагата го покаже тоа. Самите модуларни КОВИД центри беа и се уште се клучни во справување со пандемијата и хоспитализацијата на пациенти. Истите се градени по највисоки стандарди, а набавката која министерството за здравство ја правеше е согласно стандардите за ваквите болници кои се користат во многу земји во светот.“, се додава во соопштението од министерството за здравство. А.Р.