Во Грузија, позната по своите епски празници и здравици, луѓето честопати доживуваат „шемомехама“, непреводлив збор што значи кога сте сити, но сепак продолжувате да јадете.

Традиционален грузиски празник, наречен „супра“ е нешто што се смета за посебност на оваа земја. Во Грузија, ваквите оброци обично се подготвуваат поради некоја причина, а понекогаш и без никаква вистинска причина. Едноставно, за да уживате.

Се служат разни деликатеси … пастрмка прелиена со сос од орев, богата чорба од грав со свинско месо наречена лобио, печен леб со сирење познат како хачапури, пилешко со капини, јагнешка чорба, пилешко со крем сос од лук, различни видови леб. .. Сè на сè, обично нема доволно простор на масата за сите ѓаконии. Затоа не е изненадувачки што контејнерите со храна се наредени едни врз други.

Па после, како може некое лице да не доживее шемомехама?

За Грузијците, шемомехама значи дека сте сити, но ако продолжите да јадете, ќе се прејадете. Сепак, не можете да застанете – објасни за Би-Би-Си Мако Кавтараџе, основачот на Музејот на рецепти во Тбилиси.

– Тоа е ситуација кога немате намера да јадете толку многу, но „случајно“ јадете. Обично е кога нешто е толку вкусно за да не можете да одолеете. Виновникот го барате во вкусната храна, а не во тоа што сте лаком, што е добра опција – објаснува Мери Губеладзе, сопственичка на познат ресторан во Тбилиси.

Според сведоштвото на многу Грузијци, шемомехамата обично се поврзува со пријатна атмосфера, добро друштво и феноменални специјалитети.

Несомнено е дека зборот е поврзан со поимот „супра“, едноставно затоа што шемомехамата може да се постигне само ако е грузиски празник.

Храната и пијалоците честопати се поврзани со националниот идентитет, особено затоа што тоа е еден од начините да се зачува различноста. Особено во Грузија, постои исклучително силна врска помеѓу храната и националната свест. Особено кога станува збор за долгата руска доминација на регионот, која започна во 1801 година и продолжи за време на советската ера до 1991 година.
Едноставно, жителите на Грузија и тогашниот Советски сојуз имаа иста вера, така што немаше разлика во тој сегмент. Затоа народната култура беше таа што ги разликуваше овие два народа. Благодарение на оригиналниот начин на забава на посетителите, но и на традиционалното грузиско гостопримство, луѓето од таа земја успеаја да се разликуваат.

Познато е дека Грузијците секој гостин го сметаат за дар од Бога и се обидуваат да го забавуваат најдобро што можат. И знаејќи кои специјалитети ги крие кујната во таа земја, не е ни чудо што многумина доживеале шемомехама.

Подготвила:Ал.Н.