Прекршувајќи ја традицијата за прв пат од 1869 година, американскиот претседател нема да учествува во процесот на инаугурација.
Претседателот на САД во заминување Доналд Трамп ја напушти Белата куќа заедно со неговата сопруга Меланија и се упати кон неговиот имот Мар-а-Лаго во Палм Бич, Флорида.
Со оглед на тоа што тој заминува пред инаугурацијата, Трамп всушност ја напушта Белата куќа како претседател.
„Ова беа одлични четири години. Направивме многу заедно. Сакам да им се заблагодарам на моето семејство, пријатели и вработени. Луѓето не се свесни колку луѓе работат, можеа да имаат полесен живот, но тие го избраа ова”, рече Трамп во прошталниот говор, и и даде збор на првата дама Меланија Трамп.
“Да се биде ваша прва дама беше најголема чест. Ви благодарам за вашата љубов и поддршка. Бог да ве благослови вас, вашите семејства и оваа прекрасна нација”, рече Меланија.
„Она што го направивме беше неверојатно според сите стандарди“, рече Трамп пред да ги посочи промените што ги воведе во војската.
Во својот проштален говор, Трамп го пофали она што го смета за негово достигнување.
„Ако не нè погодеше пандемија, ќе имавме економски бројки како никогаш порано. Берзата е на повисоки нивоа отколку што била порано пред пандемијата. Ние ја изградивме економијата двапати. Ќе видите неверојатни бројки во иднина”, рече тој.
“Ние ја имаме најголемата земја и најдобрата економија во светот. Пандемијата нè погоди силно, исто како и целиот свет. Направивме нешто што се смета за медицинско чудо, а тоа е вакцината против ковид. Ние ја развивме за 9 месеци наместо за пет години. Наскоро доаѓа друга вакцина “, рече Трамп.
„Збогум, ве сакаме и ќе се вратиме во некоја форма“, рече Трамп.
Тој на крај му се заблагодари на потпретседателот Мајк Пенс и на „големите луѓе“ од Вашингтон, а од сцената го испрати песната на „YMCA“ на „Вилиџ пипл“. А.Н.
