Европската агенција за лекови (ЕМА) во понеделникот објави дека нејзините експерти препорачуваат условно одобрување на вакцината „Новавакс“, пишува Дојче веле. Според ДВ, ЕУ веќе потпишала договор за купување до 200 милиони дози од вакцината, во очекување на одобрение за употреба од страна на ЕМА со седиште во Амстердам.
Оваа вакцина користи поконвенционална технологија од другите вакцини – и се очекува да биде особено корисна во земјите во развој. Исто така, се верува дека, бидејќи вакцината користи поконвенционален метод за обезбедување имунитет, може да помогне да се намали недовербата во вакцините.
Компанијата „Новавакс“ рече дека нивната вакцина покажала 90,4 проценти ефикасност против КОВИД-19 во тестирањето во Северна Америка.
Пред очекуваното соопштение, извршниот директор на „Новавакс“, Стенли Ерк, рече дека компанијата „со нетрпение очекува нивната вакцина да стане нова опција во Европа“.
„Вакцината помага да се отстранат главните бариери за глобалната вакцинација, вклучително и предизвиците за глобалната дистрибуција и неодлучноста за вакцините“, додаде тој.
„Новавакс“ користи технологија слична на вакцините против хепатитис Б, кои не треба да се чуваат на ултра ниски температури. Ова им дава предност во логистиката, особено во регионите со помалку развиена инфраструктура.
Минатата недела Светската здравствена организација (СЗО) даде итно одобрение за оваа вакцина, која ја произведува американската компанија „Новавакс“ и Серумскиот институт од Индија. Вакцината „Новавакс“ е деветта вакцина одобрена од ова тело. Ал.Н.
