По повод масакрот што се случи во петокот во Цетиње, кога беа убиени 11 лица, денеска во владиниот дом во Цетиње се одржа комеморативна седница за жртвите. Комеморацијата започна со едноминутно молчење за жртвите, а беше речено дека Цетиње не е сам во својата жалост и дека тагува цела Црна Гора.
Трагедијата во Цетиње, во која во петокот животот го загубија 11 лица, е потсетник за сите дека треба да се направи се за никогаш повеќе да не се повтори ваков трагичен настан, изјави градоначалникот на престолнината, Никола Ѓурашковиќ. Тој истакна дека трагедија од невидени размери ги погодила Цетиње и Црна Гора и ги оставила сите во шок.
„Од завчера нашиот град е зафатен од тага и шок, што невини жртви загинаа без никаква вина во бесмислен напад. Таков ден не се памети“, изјави Ѓурашковиќ.
Тој изјави дека нема збор за утеха за семејствата.
„Со посебна почит ќе се сеќаваме на нашата Наташа и нејзините ангели Машан и Марко, нашите Даница, Димитрије, Рајко, Александар и Мила, Митра, Горан. Нивните брутално прекинати животи остануваат дел од нашите сеќавања, но и предупредување до сите да направат сè за никогаш повеќе да не се повтори ваков трагичен настан“, рече Ѓурашковиќ.
Потпретседателот на Собранието на престолнината Мирко Станиќ изјави дека Цетиње е опкружено со тага како никогаш досега.
„Цетиње како никогаш досега е обединето во болка со искрено чувство на тага што не засега сите нас“, изјави Станиќ.
Тој рече дека Цетиње не е сам во својата жалост, дека тагува цела Црна Гора. Тој им се заблагодари на сите за поддршката и додаде дека поддршката од другите градови значи многу.
„Црна Гора, како и многупати досега, за жал, ја обедини тагата“, рече Станиќ.
На комеморацијата присуствуваа претседателот на Црна Гора Мило Ѓукановиќ, премиерот Дритан Абазовиќ, претседателката на Собранието Данијела Ѓуровиќ, бројни министри во Владата на Црна Гора, претставници на локалните власти, како и членови на семејствата на трагичните жртви.
Во престрелката што се случи во петокот во населбата Медовина во Цетиње во близина на Владата, загинаа 11 лица, меѓу кои и напаѓачот Вук Бориловиќ (34), а шестмина беа повредени.
Животите ги загубија Данијела Радуновиќ (51), Александра Радуновиќ (52), Милан Митровиќ (37), Рајко Дрецун (56), Димитрије Дрецун (81), Даница Дрецун (74), Горан Ѓуришиќ (54), Наташа Пејовиќ Мартиновиќ (35), М.М. (11) и М.М. (8).
По повод трагедијата во Цетиње, во Црна Гора е прогласена тридневна жалост.