Италија, првата земја во Европа што воведе драстични мерки за карантин низ целата територија за да спречи ширење на корона вирусот, ја засили контролата на улиците, со зголемени ограничувања и казни за сторителите.

„Оваа недела и неколку дена после тоа се одлучувачки бидејќи ова е временскиот период кога мерките преземени од италијанската влада пред 15-20 дена се очекува да дадат резултати, а се очекува да видиме кривата (на новозаболени) да паѓа побрзо во текот на следните пет до шест дена, а бројот на смртни случаи неколку дена подоцна“, изјави за италијанското радио „Капитал“ помошник-генералниот директор на Светската здравствена организација (СЗО) Раниери Гуера.

Според него, забавувањето на растот на нови случаи на заразени „е исклучително позитивен фактор“, во некои региони на Италија смета дека падот на кривата е близу, па „врвот би можел да биде оваа недела“, пренесува дописник на „Танјуг“ од Џенова.

Во Италија, бројот на нови случаи и смртност од ефектите на вирусот „Ковид-19“ се пријавуваат секој ден во 18 часот, а според вчерашните податоци, четврти ден по ред се случи пад на бројот на нови пациенти со коронавирус. Во неделата имало 3.957, во понеделник 3.780, во вторник 3.612, а во среда 3.491 нови заразени случаи.

Кина испрати трета екипа на лекари во Италија, како и медицинска опрема, а како што објавија локалните медиуми, втор руски авион со потребната опрема пристигнал во Италија за да помогне во пандемијата.

Околу 76 проценти од населението на Италија го поддржува начинот на кој владата на земјата се бори против коронавирусот, додека процентот на населението што ги одобрува владините мерки на својата земја е помал во Франција (61 процент) и Германија (58 проценти), според истражувањето на француски „Фигаро“ спроведено од Институт Кантар.

Според мерките донесени во Италија, а кои ги применија и други земји ширум Европа за да се спречи ширењето на вирусот, сите граѓани мора да бидат во своите домови освен кога одат во купување намирници, во аптека, доктор или на работа, со пополнет формулар кој ја објаснува причината за напуштање на местото на живеење. А.Р.