Кога пред три години беше откриен, малициозниот софтвер наречен „FakeSpy“ беше претежно присутен во Јужна Кореја и Јапонија. Сега, сепак, овој малвер на андроид повторно се враќа во уште поопасно издание и напаѓа уреди во Европа.
„FakeSpy“ се шири преку лажни СМС-пораки, кои обично потекнуваат од локални поштенски услуги. Пораката тврди дека пратката не е доставена затоа што никој не бил дома, а потоа го поканува корисникот да инсталира нова апликација за пошта.
Ако корисникот наседне и ја инсталира апликацијата, таа може да преземе целосна контрола врз телефонот. Следи, чита и испраќа СМС-пораки, има пристап до сите контакти, внатрешна и надворешна меморија, но и апликации, дури и оние што треба да бидат заштитени, како банкарските.
„FakeSpy“ досега е забележан во некои европски земји како Франција, Германија и Велика Британија, но само прашање на време е пред да продолжи да се шири и на овие простори.
Советот до сите корисници на андроид телефони е да не одговараат и да не кликаат на линкови во СМС-пораки од непознати испраќачи и да не инсталираат апликации од интернет.
Апликациите претежно треба да се преземаат од „Play Store“, бидејќи безбедноста е на многу повисоко ниво. Ако добиете ваква или слична СМС порака, никогаш не ја отворајте и предупредете ги и другите! А.Н.