Првиот официјален случај на коронавирус во Европа е откриен на 24 јануари 2020 година во Франција. Во Норвешка, вирусот првпат беше официјално потврден во Тромсо на 24 февруари.
Сепак, барајќи антитела во складираните примероци на крв, истражувачите од Универзитетската болница Акерсхус (Ахус) го открија првиот позитивен резултат уште во декември 2019 година – истиот месец кога вирусот за прв пат беше откриен во Кина.
„Ова беше многу изненадувачки. Ги прегледавме примероците на крв до декември за да се увериме дека одиме доволно далеку во минатото, но не очекувавме дека ќе најдеме позитивен резултат толку рано“, вели проект менаџерката Ен Ескилд.
Како дојдоа до овие наоди?
Универзитетската болница Акерсхус зеде примероци од крв од сите бремени жени во првиот триместар помеѓу декември 2019 и декември 2020 година. Како дел од грижата за бременоста во Норвешка, се земаат примероци крв од сите бремени жени за да се провери дали има сифилис. Сите примероци се чуваат заради следење на потенцијалните заразни болести.
„Веројатно нема многу други земји кои имаат пристап до складирани примероци на крв на ниво на популација, така што има малку или никакви други ретроспективни студии“, вели Ен Ескилд.
Истражувачката група доби пристап до анонимно тестирање на примероци според Законот за контрола на инфекции. Месечно беа тестирани околу 500 примероци за антитела на ковид, а еден позитивен резултат беше пронајден во декември 2019 година, два во јануари 2020 година и еден во февруари и март, велат експертите.
Од вкупно 6.020 прегледани жени во текот на целиот период, антитела се откриени кај 98 жени. „Мора да се земе предвид дека може да дојде до одреден дел на лажно-позитивни резултати, но научниците заклучуваат дека наодите укажуваат дека вирусот циркулирал во Норвешка уште во 2019 година“, се вели во извештајот.
Најверојатно заразена во странство
Нема систематски податоци за тоа кои биле жените кои ја имале инфекцијата и дали имале симптоми, но може да се види дека жените кои имале антитела пред март 2020 година се родени во Норвешка, Источна Европа, Африка или на Блискиот Исток.
„Постојат многу индикации дека тие се заразени или во други делови на светот или преку роднини кои биле надвор од Норвешка“, вели Ескилд, кој верува дека наодите сугерираат дека инфекцијата можеби се проширила низ светот многу порано отколку што мислевме.
Првите потврдени случаи во светот датираат од декември 2019 година, а беа откриени во Вухан.
„Нашето откритие ја менува историјата на епидемијата на корона, како во Норвешка така и ширум светот“, вели Ескилд. А.Н.
