Последните подготовки за погребот на принцот Филип, сопругот на кралицата Елизабета Втора, завршија во замокот Виндзор, а церемонијата во сабота ќе биде поскромна поради пандемијата на коронавирус, иако ќе ја рефлектира неговата долга кариера во воената и јавната служба.
Полицијата патролираше пред замокот, а реки од луѓе донесоа венци. Телевизиските радиодифузери од целиот свет зазедоа позиции пред историската кралска резиденција западно од Лондон за погребот на највисокиот член на кралското семејство од погребот на мајката на кралицата во 2002 година.
Поради пандемијата на коронавирус, плановите за погреб брзо беа променети, бидејќи владините упатства го ограничуваат бројот на гости на само 30. Но, Бакингемската палата посочува дека церемонијата ќе ја рефлектира доживотната врска на принцот Филип со британската морнарица.
„Ќе ја одрази воената прецизност и мислам дека ќе биде, пред сè, прослава на добр проживеан живот“, рече генералот Ник Картер.
„Мислам дека ќе покаже и колку вооружените сили го сакаа и почитуваа“, изјави тој за „Би-Би-Си“.
Принцот Филип, кој во брак со кралицата помина 73 години, почина на 9 април на 99-годишна возраст откако помина еден месец во болница поради проблеми со срцето и инфекција.
Палатата во четвртокот објави список со гости и откри дека принцовите Вилијам и Хари нема да одат зад ковчегот еден до друг. Меѓу нив ќе биде нивниот братучед Питер Филипс, синот на принцезата Ана.
Церемонијата започнува со поворка во 14.40 часот по локално време (15.40 часот по средноевропско време) и национална минута молчење во 15 часот.
Сите гости, вклучително и кралицата, која ќе наполни 95 години следната недела, ќе носат маски, ќе седат одделно и ќе ја почитуваат физичката оддалеченост.
Кралицата ќе седи сама.
Четиричлениот хор на погребот ќе пее композиција избрана од самиот принц, а службата ќе трае 50 минути.
Меѓу 30-те гости ќе бидат принцот престолонаследник Чарлс, неговата втора сопруга Камила и уште трите деца на кралицата и осумте внуци со нивните сопруги.
Ќе бидат присутни и децата на покојната сестра на кралицата принцезата Маргарет и тројца братучеди на Филип од Германија. А.Н.
