epa08530074 (FILE) - Italian composer Ennio Morricone conducts songs from '60 Years in Music' at the Ziggo Dome in Amsterdam, The Netherlands, 21 February 2016 (reissued 06 July 2020). Italian composer Ennio Morricone died on 06 July 2020 at the age of 91. EPA-EFE/PAUL BERGEN

Познатиот италијански композитор и добитник на Оскар Енио Мориконе почина денес на 91-годишна возраст во болница во Рим, како резултат на минатонеделниот пад, објави неговиот пријател и адвокат Џорџо Асума.

За време на неговата кариера, Мориконе има компонирано музика за повеќе од 500 филмови и серии меѓу кои: „Беше еднаш во Америка“, „Добар, лош, грд“, „Недопирливи“, „Џанго“ …

Како што пренесува италијанска „Република“, Мориконе паднал и ја скршил бутната коска пред неколку дена. Во моментот на неговата смрт, неговата сопруга Марија била покрај него. Тој остави зад себе деца и внуци. Мориконе ќе биде погребан во кругот на семејството.

За време на својата повеќедецениска кариера, Мориконе направи музика за филмовите „За еден грст долари“, „Беше еднаш во Америка“, „Малена“, „Недопирливи“ и многу други, а шест пати беше номиниран за најголемата награда во областа на кинематографијата Оскар.

Тој го освои почесниот Оскар во 2007 година за неговиот значаен придонес во кинематографијата, а Оскарот како најстар добитник го прими во 2016 година за музиката за филмот „Омразените осум“ од Квентин Тарантино.

Мориконе е роден во Рим на 10 ноември 1928 година и свиреше неколку инструменти. А.Н.