На меѓувладината конференција на Србија и Европската унија во Брисел, беше отворен кластерот 4 кој вклучува четири поглавја од преговорите за пристапување на Србија во Европската унија. Отворени се поглавјата 14 (политика за транспорт), 15 (енергија), 21 (транс-европски мрежи) и 27 (животна средина). Србија во досегашните преговори со Европската унија отвори 22 поглавја, од кои две се привремено затворени, пренесе РТС.
Премиерката на Србија Ана Брнабиќ по меѓувладината конференција изјави дека денешниот ден е многу важен датум и многу важна пресвртница за Србија.
„Во согласност со новата методологија, денеска го отворивме кластерот 4 – зелена агенда и во рамките на кластерот 4 отворивме четири нови поглавја“, рече премиерката Ана Брнабиќ.
Таа оцени дека тоа е голем успех за кој сака да им честита на сите граѓани на Србија и му се заблагодари на претседателот Вучиќ за поддршката и разбирањето.
„Важно од новата методологија е политичкото управување со интеграциите. Она што го направивме во мандатот на новата влада е целосно политички заедно со министерот Јоксимовиќ да го менаџираме процесот, сите реформи, особено во областа на владеењето на правото и тоа даде резултати“, рече Брнабиќ.
Таа изјави дека отворањето на поглавјето е огромен мотив за натамошни реформи во областа на владеењето на правото, јавната администрација и економијата.
„Сакам да им се заблагодарам на сите земји-членки на Европската унија, како и на Европската комисија за нивната поддршка и разбирање. Тие покажаа дека се отворени, подготвени да видат, слушаат, наградат се што сме направиле и затоа ова е голема мотивација да продолжиме, дури ни на истиот начин како што работевме досега, туку да одиме побрзо и да работиме подобро“, изјави Ана Брнабиќ.
Ана Брнабиќ изјави дека се надева оти Србија во 2022 година ќе го отвори кластерот 3, кој, како што наведе, е готов и дека следната подготовка е за отворање на кластерот 5.
Брнабиќ изјави дека фокусот е ставен на заштитата на животната средина и дека „оваа тема е се поприсутна и поважна во Србија“.
„Нашите приоритети остануваат и регионалната стабилност, дијалогот со Приштина, економијата. Задоволна сум и денеска разговаравме за тоа какви економски резултати постигнува Србија. Очекувам нашиот раст оваа година да биде над 7, дури 7,5 проценти“, рече Ана Брнабиќ.
Таа нагласи дека степенот на усогласеност на Србија со надворешната и безбедносната политика на Европската унија во моментов е 65,55 отсто.
Брнабиќ се заблагодари на Словенија за нејзиното „успешно претседавање“, како и за поддршката на земјите-членки, Европската комисија, комесарот Вархељи и претседателката на Европската комисија Урсула фон дер Лајен.
Отворањето на преговорите за кластерот 4 претставува силен политички сигнал за посветеноста на Европската унија за пристапување на Србија, истакна европскиот комесар за проширување Оливер Вархељи. Вархељи рече дека сега за прв пат се отвораат преговори за еден кластер кој се состои од четири поглавја. Тој додаде дека со тоа Србија прави уште еден важен чекор кон влезот во ЕУ, пренесува РТС.
„Отворањето на поглавјето е многу добра вест за Србија и нејзините граѓани, како и за целиот Западен Балкан. Ова испрати силна порака дека ЕУ сака да го забрза својот ангажман во Зелената агенда“, објасни Вархељи.
Еврокомесарот за проширување рече дека со отворањето на кластерот се потврдува дека има напредок во преговорите во пристапниот процес и оти ЕУ ги поддржува сите реформи кои се спроведени во Србија. Тој нагласи дека тоа е и признание на Србија за владеењето на правото и преземените чекори за реформа на Уставот во однос на областите поврзани со отворениот кластер. Вархељи изјави дека претстои многу работа во суштинските преговори и дека само со посветен пристап Србија може да ги исполни сите услови за затворање на поглавјето.
„Меѓувладината конференција, исто така, ни овозможи да отвориме политички дијалог за клучните предизвици со кои Србија продолжува да се соочува. Кога станува збор за владеењето на правото и нормализацијата на односите со Косово и Метохија, тие остануваат клучни за процесот на пристапување“, рече Вархељи.
Вархељи рече дека е важно Србија да постигне добри резултати на терен, со цврста амбиција да отвори дополнителни кластери за време на француското претседателство со ЕУ и дека од нивна страна ќе направат се за да ги забрзаат преговорите.
„Истовременото отворање на четири поглавја внесува дополнителна динамика во преговорите за пристапување на Србија во Европската унија“, изјави денеска словенечкиот државен секретар Гашпер Довжан по меѓувладината конференција ЕУ-Србија.
Довжан го кажа заедничкиот став на ЕУ, велејќи дека за ЕУ проширувањето останува клучен приоритет кој е стратешка инвестиција во мирот, просперитетот, стабилноста во Европа.
„Посебно ми е драго што денеска се договоривме да отвориме преговарачки кластер со Србија, што е првпат. Тоа е важен резултат во преговорите и важна демонстрација на ревидираната методологија за проширување што сега се применува во пракса“, рече Довжан. А.Р.
