На еден месец до почетокот фестивалот „ЗДРАВО МЛАДИ“ го најавува Пеки Пеле, кој со музика почнува да се занимава уште во инкубатор, но со сериозна намера за издавање плочи од 2015 година. Вниманието на пошироката јавност (и нашето секако), го добива по првото негово издание Deguté за колективнот „više manje zauvijek” од Загреб, во друштво на Свемирко, Фантом, Џутко… и други артисти што гравитираат кон оваа етикета.
Иако Пеки Пеле се труди да биде мистериозен и не го открива својот вистински идентитет. Меѓу редови, во неговата биографија се навестува дека се работи за личност со фина смисла за хумор и човек што слуша широк спектар на музика. Сам за себе вели дека во стилот на својата домашна продукција комбинира танцувачки поп со панк-естетика, поради кој не го прифаќаат ниту поперите, ниту панкерите, а ние пак веруваме дека скопската публика широкоградо ќе го прифати овој талентиран млад музичар, кој во својот музички израз длабоко навлегува во synth pop/new wave сензибилитетот на 80-тите години од минатиот век.
Проверете го и запознајте го преку:
https://pekipele.bandcamp.com/
https://www.instagram.com/deguteee
https://www.facebook.com/deguteee
https://www.youtube.com/watch?v=0r8FoS_BXBo
Пеки Пеле настапува како дуо во живо и со нетрпение го очекуваме за првпат во нашиот град, каде што се приклучува на досега најавените Viagra Boys, Noga Erez, Blackstate, Belgrado, ИСКРА, Shortparis и Murman Tsuladze. 26-27 август во МКЦ парк. Билетите по цена од 800 денари (важат за двата фестивалски денови) се достапни на билетарница МКЦ и онлајн преку bileti.mkc.mk.
