Американските актери Џорџ Клуни, Кери Вашингтон и Дон Чидл заедно отвораат училиште каде што тинејџерите ќе учат да создаваат филмови и со тоа ќе се обидат да воведат разновидност во холивудската продукција.
Целта на училиштето, кое треба да започне со работа во 2022 година, е да воведе разновидност во забавната индустрија со отворање на врата за добро платени работни места за кои инаку нема формален пат.
„Нашата цел е подобро да ја рефлектираме различноста на нашата држава“, рече Клуни во понеделникот.
„Ова значи создавање на средношколски програми кои ќе ги научат младите како да управуваат со камера, да монтираат и да користат визуелни ефекти и звук и сите други можности за кариера што ги нуди индустријата“, додаде американскиот актер.
Кралската школа за филмска и телевизиска продукција ќе биде сместена во доминантно латиноамериканскиот кварт Вестлејк.
Професорите ќе имаат пристап до филмски професионалци, а студентите ќе имаат пракса и академски програми.
Во управниот одбор ќе бидат Клуни, Вашингтон, Чидл, Минди Калинг, Ева Лонгорија и тројца продуценти, а тие исто така ќе покриваат 20 проценти од првичниот буџет од 7 милиони долари.
Холивуд се обидува да донесе повеќе припадници на малцинствата во своите редови од скандалот #OscarSoWhite (Оскарите толку бели) во 2016 година. Таа иницијатива доби дополнителен интензитет минатата година откако движењето „Црните животи се важни“ (Black Lives Matter ) предизвика поширока дебата за расизмот во институциите на САД.
