Според порталот C&IT, овие конгресни центри нудат врвни простори и услуги за разноврсни настани, придонесувајќи за развојот на МICE индустријата на глобално ниво. Конгресните центри низ светот обезбедуваат извонредни услови за организирање на конференции, саеми и други настани, и се карактеризираат со импресивен архитектонски дизајн, мултифункционални простори и најсовремена технологија. Овие центри придонесуваат за економијата на градовите во кои се наоѓаат и се места за собирање на професионалци од различни индустрии, кои заеднички работат на развојот на глобалниот пазар на настани.
ExCeL London – Лондон, Велика Британија
Центарот се наоѓа покрај брегот и нуди прекрасен поглед на пристаништето Royal Victoria Dock. Обезбедува 100.000 м² модуларен простор за настани. Тоа е мултифункционален центар за организирање на различни настани, кој има посебен конференциски центар распоредени на три нивоа, со бројни простории за состаноци, салони и специјализирано фоаје. Најголемата сала, ICC, има капацитет до 4.200 учесници, додека банкетната сала може да прими 3.000 гости, а мултифункционалната конференциска сала до 2.000 учесници. Во состав на центарот има седум хотели со вкупно 1.400 соби.
Dubai World Trade Centre – Дубаи, Обединети Арапски Емирати
Изграден за организирање на настани, Dubai World Trade Centre нуди флексибилни простори што одговараат на сите големини и типови на настани. Салите 1-8 и Павилјонот се меѓусебно поврзани простори кои зафаќаат повеќе од 31.000 м² и се погодни за големи саеми. Дополнителни конференциски простори од различни големини вклучуваат Sheikh Saeed Halls, The Plaza, Trade Center Arena, Za’abeel Halls, Al Multaqua Ballroom, Sheikh Maktoum Hall и Sheikh Rashid Hall. Овој конгресен центар одигра клучна улога во развојот на MICE индустријата во регионот. Во 2023 година, угости повеќе од 53.000 компании изложувачи и околу 600 настани со над 2.4 милиони посетители од 193 земји. Центарот е отворен во 1979 година, а денес претставува порта за брзорастечките економии на Блискиот Исток и Африка, како и барана дестинација за компании од Европа и Западот.
Tokyo Big Sight – Токио, Јапонија
Ова е најголемиот конгресен центар во Јапонија. Годишно угостува околу 300 настани, располага со 16 изложбени павилјони и 24 конференциски сали. Сместен во Одаиба, Tokyo Big Sight е домаќин на светски познати настани како Comiket (Comic Market) и Tokyo International Anime Fair. Архитектурата на центарот е впечатлива, со конференциска кула висока 58 метри, распоредена на осум ката, што го издвојува од другите светски конгресни центри. На шестиот кат се наоѓаат десет конференциски сали со мали до средни димензии, додека на седмиот кат е сместена Меѓународната конференциска сала со капацитет од 1.000 седишта и три помали конференциски сали. Осмиот кат располага со пет конференциски сали. Источниот изложбен павилјон е оддалечен 600 метри, а Западниот изложбен павилјон има четири внатрешни сали кои го опкружуваат централниот двослоен атриум. Салите еден и два се наоѓаат на првиот кат, секоја со посебна соба за состаноци, два изложбени салони и седум соби за состаноци.
Sydney Convention and Exhibition Centre (ICC Sydney) – Сиднеј, Австралија
ICC Sydney е конгресен центар кој нуди 250.000 м² простор за настани на брегот на заливот Darling Harbour. Составен е од три згради, изложбен простор и театар ICC Sydney. Центарот располага со повеќе од 70 простории за состаноци, три театри и две формални банкетни сали.
Посветеноста на ICC кон општествено одговорно работење се огледува во годишните донации од 3.000 кг храна и дополнителни 3.000 кг пренаменета облека на добротворни организации кои помагаат на луѓе во потреба.
McCormick Place – Чикаго, САД
Ова е најголемиот конгресен центар во Северна Америка, со повеќе од 2,6 милиони м² изложбен простор, сместен на брегот на езерото Мичиген во Чикаго. Во 2023 година, угостил 3 милиони посетители. Центарот располага со 173 сали, 600.000 м² простор за настани и 6 банкетни сали, од кои 2 се најголемите во градот.
Капацитетот за конференции е за 18.000 луѓе. Најголемите редовни настани што се одржуваат во McCormick Place се Chicago Auto Show, International Home and Housewares Show, National Restaurant Association и International Manufacturing Technology Show. Центарот е составен од четири згради: северна, јужна, западна и Lakeside центарот, кој вклучува и театарот Arie Crown Theatre.
Shanghai New International Expo Centre (SNIEC) – Шангај, Кина
Водечкото меѓународно место за саеми во азиско-пацифичкиот регион, сместено во срцето на Шангај, SNIEC (Shanghai New International Expo Centre) располага со 17 изложбени павилјони со вкупно 200.000 м² простор без столбови, како и над 100.000 м² приземен и надворешен изложбен простор.
Центарот има 3 пространи флексибилни влезни павилјони и 51 сала и простории за состаноци. Дополнително, постојат повеќе од 40 места за храна и пијалаци и ресторани. Годишно во SNIEC се одржуваат над 100 саеми, кои привлекуваат повеќе од 4 милиони посетители.
Paris Nord Villepinte – Париз, Франција
Paris Nord Villepinte е најголемиот конгресно-саемски центар во Франција, сместен на само 15 минути од аеродромот Paris-Charles de Gaulle и 30 минути од центарот на Париз, а на помалку од три часа од сите европски престолнини. Центарот има 200.000 м² зелени површини и седум сали, и годишно угостува повеќе од 10 милиони посетители на околу 800 настани. Исто така, обезбедува четири објекти кои ќе бидат меѓу главните места за Олимписките игри во Париз 2024.
Scandinavian XPO – Шведска
На половина пат помеѓу Стокхолм и Упсала, блиску до аеродромот Stockholm Arlanda, се наоѓа Скандинавскиот XPO. Овој центар располага со три големи изложбени павилјони, флексибилни конференциски простори именувани по нордиски животни, и соби за состаноци. Погоден е за настани со капацитет до 8.400 гости.
Салата 1 е идеална за сите видови настани со звучно изолирани подвижни ѕидови кои ја делат на три дела, секој со површина од околу 550 м². Салата 2, со површина од 530 м², се наоѓа помеѓу двете поголеми сали, 1 и 3. Салата 3 е правоаголен простор со пониски тавани, што ја прави погодна за саеми и изложби.
Во истиот комплекс се наоѓаат хотел, салони, coworking простори, ресторани, лекарска ординација и голф студио. Во периодот од 2021 до 2023 година, овде се одржани неколку големи настани, вклучувајќи го и историскиот НАТО-индустриски форум во 2023 година.
Kuala Lumpur Convention Centre – Куала Лумпур, Малезија
Овој наменски изграден објект за меѓународни, регионални и локални конгреси се простира на пет нивоа и нуди 22.659 м² флексибилен функционален простор. На третиот кат се наоѓа фоајето со стаклени ѕидови од под до таван, кое обезбедува прекрасен поглед кон паркот KLCC, идеално за коктел настани и мрежни активности. Големата сала има капацитет од 2.991 учесник. Она што го прави посебно атрактивен за меѓународни учесници е близината на градските туристички атракции, кои се наоѓаат на само 5 до 10 минути пешачење.
Ова е првиот азиски објект кој го добил AIPC златниот стандард, угостувајќи 28,6 милиони посетители годишно. Непосредно до центарот е хотелот Traders, кој нуди сместување за учесниците на конференции со 571 соба, како и приватни простории за состаноци или помали конференции.
ICC Berlin (Internationales Congress Centrum) – Берлин, Германија
Еден од најголемите конгресни центри во Европа, ICC Berlin може да прими над 20.000 учесници. Центарот има вкупно 80 конференциски сали, со големини од 7 до 6.000 м². Салата 2 може да прими околу 4.000 посетители.
Internationales Congress Centrum (ICC) Berlin е едно од примарните европски места за меѓународни конгреси и еден од најголемите конференциски центри во светот. Отворен е во 1979 година, а неговото алуминиумско фасадно обложување, долго над 300 метри, често го споредуваат со изглед на вселенски брод
Ф.Спировски
