Пипува:Наташа Доковска
До вчера, ДУИ и СДСМ беа неразделни партнери, гордо позираа на прес-конференции и се фалеа со своите „успешни политики“. Заедно ги делеа функциите, моќта, и одговорноста за судбината на оваа земја. Денес? Ги гледаме како фрлаат кал едни на други, како да не ги споделуваа истите фотелји. Ова не е политика – ова е евтин театар во кој сите ние сме само неми сведоци.
ДУИ, која се продаваше како „гласот на Албанците“, сега отворено го обвинува СДСМ за корупција, неспособност и назадување. СДСМ, од друга страна, не штеди зборови да ја дискредитира „партнерската“ партија, која до вчера беше „столбот на стабилноста“. Се прашувам, каде беа овие критики кога заедно си го делеа пленот?
Да бидеме искрени: ова не е идеолошки конфликт. Ова е битка за опстанок. Партиите, кога ќе почнат да губат поддршка, секогаш ја бараат вината кај другиот. Но, во овој случај, вината е заедничка. И СДСМ и ДУИ се соучесници во корупцијата, нефункционалната администрација и заробената држава. Да се прават сега „невини“ е не само лицемерно, туку и навредливо за секој граѓанин.
Овој „развод“ меѓу коалиционерните партнери само ја разоткрива нивната вистинска природа. Тоа се партии кои не се грижат за граѓаните, туку за сопствениот интерес. Денес, тие ја кројат приказната на нови „непријатели“, но вистината е дека тие се едни со други соучесници во секоја политичка манипулација, секоја украдена можност за напредок.
Прашањето е: до кога ќе ги трпиме? До кога ќе дозволуваме партиите да се колат и да се молат едни на други, а народот да плаќа за нивните сметки? Кој ќе ја преземе одговорноста за пропаднатите надежи на илјадници луѓе кои уште веруваат во некаква промена?
Ова не е само крај на една коалиција. Ова е крај на илузијата дека овие партии некогаш се грижеле за граѓаните. Колената се валкаат во калта, но нас не ни останува ништо друго освен да ја исчистиме сцената. Време е за нови актери. Време е за нова приказна.
