Американската администрација за храна и лекови (ФДА) издаде ново предупредување за вакцината „Џонсон и Џонсон“, наведувајќи дека податоците покажуваат дека постои зголемен ризик од развој на ретко невролошко пореметување шест недели по вакцинацијата.
Во писмо до компанијата, ФДА наведува дека шансите за развој на Гилен-Баре синдром (ГБС) по вакцинацијата се „многу мали“. Но, додава дека оние кои примиле вакцина „Џонсон и Џонсон“ треба да побараат медицинска помош доколку чувствуваат слабост, пецкање, имаат потешкотии при движење или мимики.
Околу 12,8 милиони луѓе ја примиле оваа вакцина во САД, а 100 извештаи за ГБС се пријавени кај вакцинираните со вакцините „Џонсон и Џонсон“, вклучувајќи 95 сериозни случаи за кои била потребна хоспитализација и еден констатиран смртен случај.
„Џонсон и Џонсон“ рекоа дека разговараат со регулаторите за случаите со ГБС.
ГБС е ретка невролошка состојба во која имуниот систем ја напаѓа заштитната обвивка на нервните влакна. Повеќето случаи се придружени со бактериска или вирусна инфекција, а претежно луѓето целосно се опоравуваат.
Оваа состојба беше поврзана со вакцинирање во минатото – претежно во времето на вакцинацијата против свинскиот грип во САД во 1976 година, и неколку децении подоцна со вакцината користена за време на пандемијата на грип Х1Н1 во 2009 година.
Според Центарот за контрола и превенција на болести на САД (ЦДЦ), овој несакан ефект се јавувал претежно кај мажи и претежно кај постари од 50 години.
Новото предупредување е уште еден удар врз вакцината „Џонсон и Џонсон“, која се сметаше за важна алатка за вакцинирање на жителите на тешко достапните области и оние кои се двоумат дали да се вакцинираат, затоа што е потребна само една доза од вакцината и е полесна за чување отколку вакцините на „фајзер“ и „Модерна“.
Но, употребата на овие вакцини е веќе поврзана со појава на многу ретки и потенцијално смртоносни тромби. Регулаторите во САД во април објавија дека придобивките од таа вакцина го надминуваат ризикот од појава на згрутчување на крвта. А.Р.