Овој град во 1947 година одеднаш беше поделен меѓу две земји, на два града, на два народа. Во 2025 година, по речиси 80 години, тие повторно ќе се обединат во првата транснационална Европска престолнина на културата.
Нова Горица е модерен град во западниот дел на Словенија, сместен непосредно до границата со Италија, каде што се прилепува до италијанскиот град Горица (Gorizia). Основан е во 1947 година, откако со Парискиот мировен договор дојде до поделба на Горица меѓу Италија и тогашна Југославија. Нова Горица беше изградена со цел да стане административен и урбан центар на словенечкиот дел од овој регион.
Градот е планиран и изграден под влијание на модернистичката архитектура, со цел Југославија да ги демонстрира своите можности во големите урбанистички проекти. Денес брои околу 30.000 жители и е познат по својата уникатна историја, близината до границата и културната размена со италијанската Горица.
Нова Горица долго време беше популарна меѓу италијанските туристи поради своите казина, но во последните години привлекува внимание и поради својата богата културна понуда, историските знаменитости и близината до природните убавини, како што се долината на реката Соча и околните Алпи.Посебно значајна е нејзината улога во проектот GO!2025, во кој заедно со италијанската Горица ќе стане првата транснационална Европска престолнина на културата, славејќи ја заедничката историја, отворените граници и културната разновидност на регионот. Ова признание нуди можност за развој на нова инфраструктура, организација на бројни културни настани и промоција на регионот како единствена туристичка дестинација.
С.Н.
