ЕУ воведува нови правила: Компаниите ќе мора да ја откриваат разликата во платите меѓу жените и мажите
Европската Унија од денеска воведува нови правила за транспарентност на платите со цел да се намали јазот во заработката меѓу жените и мажите. Земјите членки имаат рок до 7 јуни 2026 година да ги усогласат своите национални законодавства со новата директива.
Според новите правила, работодавачите ќе мора да обезбедат поголема транспарентност при вработувањето и утврдувањето на платите. Кандидатите за работа ќе имаат право однапред да добијат информации за висината или распонот на платата за работното место, а работодавците повеќе нема да смеат да ги прашуваат кандидатите колкава плата земале на претходното работно место.
Дополнително, вработените ќе имаат право да побараат информации за просечните плати во нивната категорија на работни места, распределени според пол, што ќе овозможи полесно откривање на евентуална дискриминација.
Компаниите со повеќе од 100 вработени ќе бидат обврзани редовно да известуваат за родовиот јаз во платите. Доколку анализите покажат разлика поголема од 5 проценти која не може да се оправда со објективни и родово неутрални критериуми, работодавачот ќе мора да преземе корективни мерки и да спроведе заедничка проценка на платите со претставниците на работниците.
Новата директива предвидува и построги механизми за заштита на работниците. Лицата кои ќе бидат жртви на дискриминација во платите ќе имаат право на целосна компензација, а компаниите што ќе ги прекршуваат правилата може да се соочат со финансиски казни и други санкции.
Според најновите податоци на ЕУ, жените во Унијата во просек заработуваат околу 11 проценти помалку по работен час од мажите, и покрај долгогодишните законски гаранции за еднаква плата за еднаква работа. Европските институции очекуваат дека новите правила ќе придонесат за поголема правичност на пазарот на трудот и постепено намалување на родовите разлики во примањата.
Н.Д.
