Во 2023 година, Фолксваген – најголемиот од дванаесетте марки на групацијата Фолксваген – произведе над 4,8 милиони патнички автомобили ширум светот и оствари приход од над 86 милијарди евра (90,2 милијарди долари), што претставува зголемување од 17 отсто во споредба со претходната година. Ова произлегува од годишниот извештај објавен во март 2024 година.
Но, тие убави времиња се во минатото. Пазарот во меѓувреме значително се промени, особено за електричните возила. А има и погрешни оценки на менаџментот на ВВ, кои го загрозуваат успехот на компанијата, оценува „Дојче веле“.
Побарувачката за нови возила во Европа паѓа и можеби никогаш нема да го достигне нивото пред коронавирусот, кога годишно се продаваа 17 милиони возила. Побарувачката за возилата на Фолксваген особено опадна откако кинеските конкуренти го презедоа глобалниот пазар на електрични возила.
Во првите девет месеци од минатата година Фолксваген продаде 2,26 милиони возила ширум светот. Тоа е нешто повеќе од истиот период лани, а приходите се благо зголемени. Сепак, оперативната добивка, според концернот, паднала за речиси 37 отсто од 2,12 милијарди евра во првите три квартали од 2023 година на 1,34 милијарди евра во истиот период минатата година. Причината: повисоки фиксни трошоци и преструктуирање.
Дома во Германија, ситуацијата во Фолксваген е напната. Компанијата најави драстични намалувања. Зголемувањето на цените на енергијата по прекинот на испораките на рускиот гас, кинеската конкуренција, високите германски трошоци за работна сила и претстојните американски тарифи бараат промена на насоката.
Како што соопшти компанијата на 20 декември минатата година, со синдикатите е постигнат договор за постепено укинување на 35.000 работни места, додека останатите вработени во Фолксваген во Германија ќе мора да се откажат од зголемувањето на платите и бонусите во наредните години.
Дали другите земји би можеле да профитираат од проблемите на локациите на Фолксваген во Германија?
Фолксваген вработува 76.000 работници во Германија и дополнителни 63.000 ширум светот. Или поради близината со клиентите или поради поевтината работна сила – компанијата има голема мрежа на производствени локации низ светот. Покрај Германија, моментално има производствени капацитети и во Полска, Шпанија, Португалија и Словачка, пренесува „Блиц“.
По инвазијата на Украина во 2022 година, сите фабрики во Русија беа затворени, вклучително и една голема фабрика, а увозот беше запрен. Една година подоцна, Фолксваген го продаде целиот свој имот во земјата, како и другите европски производители на автомобили. Планираната фабрика во Турција не беше реализирана поради пандемијата Ковид-19.
Покрај тоа, Фолксваген произведува возила во Аргентина, Бразил, Мексико, САД, Кина, Индија и Јужна Африка. Надвор од Европа, најголемите инвестиции на Фолксваген се во Кина, а потоа следат Мексико и Бразил.
Првата фабрика на Фолксваген надвор од Германија беше отворена пред седум децении во далечниот Бразил. Денес, „Volkswagen do Brasil“ е, според компанијата, најголемиот производител во таа земја. Минатата година беше произведено 25 милионито возило.
Иако Јужна Америка учествуваше со само осум проценти од продажбата во 2023 година, Фолксваген моментално е во голема мера зависен од Бразил. Компанијата таму ужива голема репутација и голем дел од возилата на бразилските патишта доаѓаат од Фолксваген. Покрај тоа, продажбата се зголемува.
Оваа позитивна вест од Бразил донекаде ја ублажи загрижувачката состојба. Но, пазарот е премногу мал за да ги надомести загубите во другите региони – а конкуренцијата не е далеку.
Иако Северна Америка учествуваше со нешто повеќе од десет проценти од продажбата на Фолксваген во 2023 година, таа е клучен пазар. Но, тоа е, исто така, тежок пазар што може да стане уште построг ако САД воведат царини за возила од странско производство.
Фолксваген има фабрика во американската сојузна држава Тенеси. Но, бидејќи Фолксваген смета и на поевтина работна сила и слободен проток на стоки во северноамериканската зона за слободна трговија (USMCA), компанијата има и голема фабрика во Мексико. Но, таа стратегија би можела да биде поткопана од новите американски царини.
Новоизбраниот американски претседател Доналд Трамп рече: „Сакам германските автомобилски компании да станат американски автомобилски компании“. „Сакам тука да ги градат своите фабрики.“
Германските производители на автомобили произведуваат различни возила во САД. Многу од нив се наменети за домашниот пазар, а други за извоз. Но, Фолксваген сè уште зависи од европскиот увоз за целосно да ја задоволи американската побарувачка. Заканите на Трамп за царини може дополнително да ги загрозат деловните резултати на „VW Group“.
Фолксваген со години полага големи надежи за водење бизнис во и со Кина. Во последната деценија, концернот се потпираше на таа земја бидејќи и овозможи да постигне значителен раст на продажбата и да го прошири производниот капацитет. И двајцата сега се под закана, а кинескиот сон на Фолксваген можеби е завршен.
Во 2019 година, Фолксваген беше најголемиот производител на автомобили во Кина и имаше 19 отсто пазарен удел на тогашниот најголем светски пазар на автомобили. За Фолксваген , Кина беше најважниот и најпрофитабилен регион, со една третина од вкупните приходи и голем дел од профитот.
Денес Фолксваген има пазарен удел од 14 проценти во Кина, а трендот е во опаѓање. Домашните кинески конкуренти продаваат се повеќе возила. Тие се особено добри во производството на евтини електрични автомобили кои се популарни кај клиентите – толку евтини што Канада, САД и ЕУ неодамна воведоа дополнителни царини за кинеските електрични возила. Кина сега е најголемиот светски извозник на автомобили и е помалку зависна од кога било од странски модели.
И покрај својата долга историја и глобално присуство, Фолксваген не е имун на неуспеси. За успешно да ги надмине следните големи промени, концернот мора да се прилагоди и да ги земе предвид обичаите, различноста на пазарот и кинеската конкуренција, која со неверојатна брзина го стигнува Фолксваген. А.Р.