Бугарија од 1 јануари 2026 официјално го замени својот национален бугарски лев со еврото и стана 21-ва членка на еврозоната — важен чекор во нејзиното економско и политичко интегрирање во Европската унија.
За властите ова е историски момент кој ќе ја зацврсти економијата, ќе ја олесни трговијата и ќе ја намали корупцијата, но на улиците на Софија мислењата се поделени.
Дел од граѓаните го гледаат воведувањето на еврото како логичен и неопходен чекор што ќе им донесе поедноставена трговија со партнерите во ЕУ и помали трошоци при меѓународно работење.
Сепак, многумина изразуваат страв од раст на цените и губење на националниот симбол — левот, кој за многу Бугари беше повеќе од само валута. Постои загриженост дека промената ќе влијае на секојдневниот живот и дека луѓето не се доволно подготвени за новата валута.
На пазарите во Софија продавниците прикажуваат цени во двете валути, но некои потрошувачи се збунети и имаат потешкотии да се навикнат на новите износи.
Воведувањето на еврото доаѓа во време кога во Бугарија и понатаму има политичка и економска неизвесност, а аналитичарите предупредуваат дека ефектите од таа транзиција ќе се чувствуваат уште некое време.
Во јануари 2026 година левот и европската валута ќе циркулираат паралелно до крајот на месецот, додека од 1 февруари 2026 година еврото ќе биде единствено законско средство за плаќање.
Ф.С.
