По повеќе од три години судски постапки, во Белград конечно беше изречена нова првостепена пресуда во случајот со масакрот во основното училиште „Владислав Рибникар“, каде на 3 мај 2023 година 13-годишно момче уби девет ученици и училишен чувар, а рани уште неколку лица. Според српските медиуми, судот ги прогласил виновни родителите на момчето за пропустите кои довеле до трагедијата, додека самиот малолетник не може кривично да одговара бидејќи во моментот на злосторството немал наполнето 14 години.
Во текот на изрекувањето на пресудата беа откриени и досега непознати детали од комуникацијата меѓу момчето и неговата мајка, кои дополнително ја потресоа јавноста. Судот разгледувал пораки од нивните мобилни телефони кои покажуваат сериозно нарушени семејни односи уште неколку години пред масакрот. Во една од пораките момчето ѝ напишало на мајка си дека ја мрази, додека во други преписки се забележуваат навреди, конфликти и целосно отсуство на здрава комуникација меѓу членовите на семејството.
Адвокатите на семејствата на жртвите пред судот посочиле дека родителите немале соодветен надзор врз своето дете и не покажувале доволна контрола врз неговото однесување. Дополнително, на судењето било наведено дека ноќта пред масакрот момчето гледало вознемирувачка и експлицитна содржина на интернет, без родителите да реагираат или да бидат свесни за тоа.
Трагедијата во „Рибникар“ останува едно од најтешките злосторства во поновата историја на Србија. Нападот траел само две минути, но зад себе остави десет жртви и трајни последици за нивните семејства и целото општество. Случајот отвори бројни прашања за одговорноста на родителите, пристапот до оружје, менталното здравје на младите и безбедноста во училиштата.
Семејствата на жртвите изјавија дека ниту една пресуда не може да ја врати загубата на нивните деца, но дека конечното судско решение претставува важен чекор кон утврдување на одговорноста и спречување вакви трагедии во иднина.
Н.Д.
