Младиот фудбалски бисер Јан Диоманде продолжува да го воодушевува светот со своите настапи на Светското првенство, но зад неговиот спортски успех се крие длабока лична трагедија. Само 19-годишниот репрезентативец на Брегот на Слоновата Коска и член на Лајпциг е еден од најбараните млади фудбалери во Европа, а според медиумите за него сериозен интерес покажува и Ливерпул.
Диоманде блесна на отворањето на Светското првенство во победата над Еквадор со 1:0, по што беше прогласен за играч на натпреварот. Неговите одлични партии дополнително ја зголемија неговата вредност на трансфер-пазарот.
Но, и покрај спортската бајка што ја живее, младиот крилен напаѓач сè уште се бори со огромна болка поради смртта на неговата сестра Роксан. Таа починала пред две години на само 15-годишна возраст во главниот град на Брегот на Слоновата Коска, Абиджан, откако консумирала пијалак во кој била ставена дрога. Во тој период Диоманде се школувал во САД, далеку од своето семејство.
За време на Светското првенство, фудбалерот објави емотивно писмо посветено на својата покојна сестра. Во него порача дека секој негов успех е посветен на неа и дека нејзиниот спомен му дава сила да продолжи напред и во најтешките моменти. Писмото предизвика силни реакции кај навивачите и спортската јавност.
Приказната на Диоманде е потсетник дека и зад најголемите спортски ѕвезди често се кријат лични трагедии и животни борби. Додека светот му предвидува блескава кариера и трансфер вреден десетици милиони евра, тој останува млад човек кој секојдневно се обидува да се справи со загубата на својата најсакана сестра.
Ф.С.
