Цените на билетите за долгоочекуваниот филм Dune 3 достигнуваат неверојатни суми, при што некои од нив се препродаваат и до 1000 долари. Огромната побарувачка, особено за IMAX проекции, доведе до вистинска „трка“ меѓу фановите кои сакаат да си обезбедат место за премиерата.
Филмот треба да има премиера на 18 декември 2026 година, но и покрај тоа што има уште неколку месеци до прикажувањето, интересот веќе е огромен. Warner Bros. пушти билети во продажба за специјални IMAX проекции во 70 мм формат, што дополнително ја зголеми побарувачката.
Проблемот е што само ограничен број кина – околу 18 во САД – нудат вакво искуство, па понудата е многу мала во однос на интересот. Како резултат на тоа, препродавачите брзо ги искористија условите и почнаа да нудат билети на платформи како eBay по цени што достигнуваат речиси 1000 долари (околу 920 евра).
Овој феномен уште еднаш покажува дека „Dune 3“ е еден од најочекуваните филмови во годината, а фановите се подготвени да платат високи суми само за да бидат дел од премиерното искуство.
С.Н.
