Нема договор за прекин на огнот по завршување на средбата на шефовите на дипломатиите на Русија и Украина Сергеј Лавров и Дмитриј Кулеба во Анталија која траеше час и половина. Украинскиот министер за надворешни работи Дмитриј Кулеба изјави дека на средбата со рускиот министер за надворешни работи Сергеј Лавров не е постигнат договор за прекин на огнот.
Првин разговараа шефовите на дипломатиите на Русија и Турција, Сергеј Лавров и Мевлут Чавушоглу во Анталија, изјави портпаролката на руското Министерство за надворешни работи, Марија Захарова.
Исто така, украинскиот министер за надворешни работи Дмитро Кулеба денеска во Анталија разговараше со неговиот турски колега Мевлут Чавушоглу во рамки на работната посета на Анталија, објави на Фејсбук прес-службата на украинското Министерство за надворешни работи.
Кулеба му се заблагодари на Чавушоглу за иницијативата да се организира средба со рускиот министер за надворешни работи Сергеј Лавров.
Во таа прилика Кулеба покрена три клучни прашања на кои ќе инсистира на трилатералната средба со Лавров, како што се итен прекин на огнот, подобрување на хуманитарната ситуација во Мариупол, Харков, Суми, Волноваха и други украински градови и повлекување на руските војници од Украина.
