Десетици земји во вторникот одобрија намалување на статусот на заштита на волците во Европа, потег кој активистите тврдат дека ќе го наруши опоравувањето на оваа врста во последните 10 години, откако речиси беше истребена пред еден век. Членките на Бернската конвенција, која се грижи за заштита на дивиот свет во Европа и некои африкански земји, се согласија да го намалат статусот на заштита на волците од „строго заштитени“ на „заштитени“, соопшти Советот на Европа. Сивите волци речиси беа истребени во Европа пред 100 години, но нивниот број речиси се удвои на сегашната популација од 20.300, предизвикувајќи протести од земјоделците кои се лути поради тоа што животните им ја напаѓаат стоката. Намалувањето на статусот на волците на „заштитени“ ќе овозможи лов под строга регулација, што активистите се плашат дека може да доведе до значителен број на убиени волци.
Мешани реакции додека Франција се подготвува да ги олесни правилата за отстрел на волците
„Ни треба избалансиран пристап помеѓу зачувувањето на дивиот свет и заштитата на нашите средства за живот,“ изјави претседателката на Европската комисија, Урсула фон дер Лајен, која силно го поддржа намалувањето на заштитата.
Бернската конвенција е меѓународен договор на Советот на Европа за заштита на природата, кој стапи на сила во 1982 година. Европската Унија, која е сосема одделна од Советот на Европа, е дел од конвенцијата.
„Далеку од решено“
Овој потег следува по поддршката од ЕУ во септември за планот за намалување на статусот на заштита на волците, бидејќи растечката популација на оваа врста сѐ почесто ги доведува животните во контакт со луѓето. Популацијата на волците во Европа речиси се удвоила во последните 10 години, достигнувајќи 20.300. Но, од друга страна, блискоста на овие месојадци со човечките активности предизвикува значителна штета на стоката, соопшти Брисел. Кон крајот на 2022 година, самата фон дер Лајен го загуби својот омилен пони Доли од волк кој влегол во оградениот простор на нејзиниот семеен имот во северна Германија, што доведе до претпоставки дека ова прашање за неа станало лично. Но, некои земјоделци велат дека одлуката од вторникот не е доволна за заштита на нивната стока.
„Проблемот е далеку од решен“, изјави Тјери Шалмен, претседател на земјоделската комора во североисточна Франција.
„Која е разликата помеѓу супер-разбојник и обичен разбојник,“ додаде Шалмен, кој во септември ги охрабруваше земјоделците да „се вооружат и да стрелат во волците“ ако ги видат.
„Чиста демагогија“
Активистите за правата на животните велат дека овој потег ја загрозува популацијата на волците, која во еден момент целосно исчезна од Франција.
„Ризикот од намалувањето на овој статус е ослабување или дури и намалување на бројноста на оваа врста во Европа“, рече Јан Лоран од WWF Франција.
Некои тврдат дека убивањето волци нема да го намали бројот на напади врз стоката. Одлуката е „политичка и чисто демагогска“, рече Натан Хоренбергер, раководител на француска асоцијација за биодиверзитет.
„Тоа нема да помогне да се решат проблемите со кои се соочуваат земјоделците, бидејќи волците се убивани во европските земји со години… а тоа не дава резултати“, додаде тој.
Убивањето волци може дури и да го наруши однесувањето на јатата, создавајќи „повеќе осамени животни, кои се свртуваат кон полесен плен, како што се домашните животни“, изјави Хоренбергер за AFP. Промената ќе биде спроведена на 7 март 2025 година, соопшти комисијата, освен ако најмалку една третина од нејзините членки не се противат.
Но, само пет земји гласаа против мерката, изјави еколошката асоцијација Green Impact, која ја нарече одлуката „срамота“ и вети дека ќе ја однесе пред европските судови. „Волкот останува заштитена врста,“ изјави француската министерка за екологија Агнес Пание-Рунашер, ветувајќи дека секое убивање на ова месојадец „ќе остане строго регулирано“.
Подготви: А.Н.
