Безбедносен инцидент ја одбележа една од натпреварувачките вечери на Светското клупско првенство, откако воените сили интервенираа поради сомнителен дрон кој летал во близина на стадионот каде се одржувал натпреварот.
Според медиумските извештаи, дронот бил забележан во забранета зона над спортскиот објект, по што безбедносните служби веднаш реагирале. Леталото било следено и на крајот соборено поради сомнежи дека можело да се користи за шпионирање или неовластено снимање на натпреварот и околината.
Инцидентот повторно ги отвори прашањата за безбедноста на големите спортски настани, особено во време кога дроновите стануваат сè подостапни и почесто се користат за снимање, но и за потенцијално собирање чувствителни информации. Организаторите на првенството имаат воведено строги правила за воздушниот простор над стадионите, а секое неовластено летало се смета за безбедносна закана.
Надлежните служби започнале истрага за да утврдат кој управувал со дронот и со каква цел бил испратен над спортскиот комплекс. Засега нема информации за повредени лица или материјална штета како последица од интервенцијата.
Во последните години, организаторите на големи спортски натпревари сè почесто се соочуваат со вакви инциденти, поради што безбедносните мерки околу стадионите се значително заострени, а во некои случаи се користат и специјални системи за откривање и неутрализирање на дронови.
Ф. Спировски
