Светското првенство 2026 веќе донесе неколку историски моменти, но еден од најинтересните рекорди не го поставија фаворитите, туку репрезентациите од кои малкумина очекуваа големи резултати.
Најголемото изненадување е селекцијата на Курасао, која за првпат настапува на Мундијал и веќе влезе во историјата. Покрај нивниот успех, рекорд постави и нивниот селектор, искусниот холандски стратег Дик Адвокат. Со 78 години и повеќе од осум месеци, тој стана најстариот селектор што некогаш водел репрезентација на Светско првенство.
Интересно е што претходниот рекорд опстојуваше цели 16 години. Него го држеше Ото Рехагел, кој ја предводеше Грција на Мундијалот во 2010 година. Но, на овој шампионат рекордот беше урнат дури трипати за само неколку дена. Најпрво го надмина селекторот на Јужна Африка, Хуго Брос, потоа чешкиот селектор Мирослав Коубек, а конечно на врвот се искачи Адвокат.
Овој необичен рекорд покажува дека на Светското првенство не се испишува историја само преку голови и трофеи. Понекогаш во центарот на вниманието се наоѓаат репрезентации и луѓе кои пред почетокот на турнирот биле сметани за аутсајдери или „непожелни“, а токму тие стануваат дел од фудбалската историја.
Светското првенство во САД, Канада и Мексико продолжува да носи изненадувања, а приказната за Курасао и Дик Адвокат е доказ дека на најголемата светска сцена секогаш има место за нови рекорди и неочекувани херои.
Ф.С.
