Пишува: Наташа Доковска
Како одговор на несреќниот пресврт на настаните што ме спречија да присуствувам на денешниот настан во Баку, морам да изразам длабоко разочарување. Првично, бев поканета од Националната агенција на Азербејџан за соработка со организации од граѓанското општество како панелист на овогодинешниот COP. И ќе беше мој 23ти COP! Меѓутоа, моето учество, како и учеството на мојата колешка, Александра Радевска, беше ненадејно откажано. Оваа одлука беше донесена откако споделив објава од Мишел Форст, Специјален известувач за Архуската конвенција, кој се залага за транспарентност, еколошка правда и заштита на бранителите на животната средина на глобално ниво.
Откажувањето зборува многу. Зборува за Азербејџан, но и за ОН кои третпат последователно организиаат конференција во земји каде нема почитување на човековите права, а за кои тие се залагаат. Кога една земја спречува активисти да присуствуваат на настан, тоа предизвикува сериозна загриженост за состојбата на слободата на изразување и можноста гласовите на граѓанското општество да бидат слушнати без страв од цензура или репресија. Исклучувањето на учесниците на ваков начин ги поткопува основните принципи на отворен дијалог и заемно разбирање, кои се неопходни за решавање на комплексните еколошки и социјални прашања со кои се соочуваме денес.
Активистите и застапниците присуствуваат на овие собири не само за да зборуваат, туку и за да слушаат, учат и разменуваат идеи. Замолчувањето на овие гласови преку исклучување не влијае само на оние директно инволвирани; влијае на пошироката мрежа на поединци и организации посветени на позитивни промени. Слободата на изразување и отворениот граѓански простор се основни темели на секоја нација посветена на демократските принципи. Негирањето на тој простор сигнализира опасен правец, во кој критичките гласови можеби повеќе нема да бидат толерирани.
Ова искуство ја нагласува потребата за заштита и застапување на правата на активистите насекаде и ја зацврстува мојата решеност да продолжам со борбата за еколошка правда, слобода на изразување и заштита на гласовите на граѓанското општество.
И да, оваа година ќе известувам за COP од дома!!!
