И покрај економските и геополитичките предизвици, европскиот сектор за сместување влегува во следната туристичка сезона со доза на оптимизам. Според најновиот „European Accommodation Barometer 2026“, објавен од Booking.com во соработка со Statista, дури 66 проценти од хотелите и другите сместувачки капацитети очекуваат позитивен развој во наредните 12 месеци, додека 60 проценти ја оценуваат својата моментална економска состојба како добра.
Истражувањето е спроведено меѓу 1.240 менаџери и директори од туристичкиот сектор во 24 европски пазари и покажува дека индустријата успеала да ја задржи стабилноста и покрај бројните предизвици со кои се соочуваше во последните години.
Сепак, зад позитивните бројки се крие сè поголем јаз меѓу големите хотелски синџири и малите независни сместувачки објекти. Додека 72 проценти од хотелските синџири ја оценуваат својата економска состојба како позитивна, тоа го прават само 55 проценти од независните оператори. Слични разлики се забележуваат и кај цените на собите и пополнетоста на капацитетите.
Во однос на пазарните трендови, растот на цените на сместувањето е забавен во споредба со претходните години. Само 40 проценти од испитаниците пријавиле зголемување на просечната дневна цена на собите, во споредба со 43 проценти една година претходно. Од друга страна, пополнетоста бележи раст, при што половина од испитаниците изјавиле дека имаат повеќе гости отколку лани.
Извештајот открива и сериозни разлики во подготвеноста за справување со сајбер-закани. Дури 94 проценти од големите хотели сметаат дека се добро подготвени за кибернетички ризици, додека истото го велат само 60 проценти од помалите објекти со помалку од десет вработени. Кај малите бизниси, сајбер-безбедноста е и многу поголема грижа за иднината отколку кај големите оператори.
Според анализата, хотелските синџири продолжуваат да имаат предност благодарение на подобриот пристап до финансии, побрзото воведување нови технологии и поголемиот капацитет за справување со економските притисоци. Независните хотели и алтернативните сместувачки капацитети остануваат поранливи на пазарните промени и имаат потешкотии во следењето на дигиталната трансформација на секторот.
Иако европскиот туризам генерално покажува отпорност и стабилност, резултатите од барометарот предупредуваат дека идниот развој ќе зависи од тоа колку успешно помалите туристички бизниси ќе успеат да ги надминат предизвиците поврзани со технологијата, безбедноста и конкурентноста.
Ф.Спировски
