Француската иницијатива за итна финансиска поддршка на жртвите од семејно насилство обезбедува средства во рок од три до пет дена, покривајќи итни трошоци за оние кои бегаат од насилство. Од нејзината имплементација на 1 декември 2023 година, досега помош примиле 36.115 жени, изјави министерката за родова еднаквост, Аурор Берже, во интервју за весникот La Voix du Nord.
Просечниот износ на исплатената помош изнесува 877 евра, додаде министерката.
Прв фемицид во 2025 година
Берже ги објави овие бројки за време на нејзината посета на градот Омон во северна Франција, каде што беше регистриран првиот фемицид за 2025 година.
Исабел Мортењ, 52-годишна домаќинка, беше убиена на првиот ден од Новата година. Нејзиниот сопруг е обвинет за убиство со умисла.
Министерката се придружи на семејството на жртвата и стотици локални жители, кои положија бели рози пред општинската зграда, на чија фасада беше поставен транспарент со натпис: „Во спомен на Исабел Мортењ“.
Во 2024 година, 1.889 пакети за итна помош беа доделени во регионот Норд, каде што се наоѓа Омон, изјави Берже.
Предизвици за справување со семејното насилство
Иако финансиската помош има за цел да им помогне на жртвите да ги напуштат насилните домаќинства, статистиката покажува колкав е предизвикот.
Официјалните податоци покажуваат дека 93 жени биле убиени од страна на нивниот партнер или поранешен партнер во 2023 година. Иако ова е намалување во споредба со претходната година, случаите на семејно насилство се во пораст.
Најновиот извештај на Министерството за внатрешни работи објавен во ноември 2023 година покажува дека безбедносните сили регистрирале околу 271.000 жртви на семејно насилство во текот на годината, од кои жените се огромното мнозинство.
Овој број претставува двојно зголемување на пријавените инциденти од 2016 година.
Подготви: С.Н.
