IKEA објави дека ќе донира 6 милиони евра во фонд за поддршка на жртвите од поранешната диктатура во Источна Германија, признавајќи дека дел од нејзините добавувачи користеле политички затвореници како принудни работници. Шведската компанија официјално ја објави својата посветеност кон фондот, предавајќи декларација за намера до Евелин Цупке, комесарка на Германија за жртвите на неправдите од комунистичката ера.
Овој договор е резултат на повеќегодишни преговори помеѓу IKEA, организацијата на жртвите UOKG и Цупке, која од 2021 година е назначена за владина комесарка за ова прашање.
„За мене, поддршката на IKEA за фондот е израз на одговорен пристап кон темните страници од историјата на компанијата,“ изјави Цупке.
Ikea првично призна во 2012 година, по независна истрага, дека дел од нејзините добавувачи во Источна Германија ангажирале политички затвореници за производство на стоки за компанијата во доцните 70-ти и раните 80-ти години. „Длабоко жалиме што производи за IKEA беа произведувани од политички затвореници,“ изјави Валтер Каднар, раководител на IKEA во Германија.
По доаѓањето на власт во 2021 година, германската коалициска влада се обврза да воспостави фонд за поддршка на жртвите од злосторствата на источно-германската власт пред обединувањето на Германија во 1990 година. Германскиот парламент наскоро ќе гласа за создавање на овој фонд.
Каднар изјави дека IKEA одамна ги уверила засегнатите дека ќе се искупи за претрпеното малтретирање. „Затоа ја поздравуваме имплементацијата на фондот за поддршка и ни е драго што можеме да го одржиме своето ветување,“ додаде тој.
С.Н.
