Во Ватикан, по три недели интензивни дискусии, заврши Синодот кој ги собра кардиналите, епископите и лаиците од целиот свет за да размислат за иднината на Црквата и нејзината мисија во светот. Една од клучните теми на овој синод беше местото на жените во рамките на институцијата која многумина ја сметаат за претерано патријархална. Сепак, моментално нема планови за учество на жените во рамки на црквата.
На завршната миса, папата Франциск ја водеше свеченоста во базиликата Свети Петар, истакнувајќи ја важноста на дијалогот за иднината на Црквата. Документот од синодот, усвоен во саботата, вели дека „нема никакви причини или пречки кои би ги спречиле жените да извршуваат водечки улоги во Црквата,“ но прецизни дефиниции за тие улоги сè уште недостигаат. Иако е охрабрено учеството на жените во обуката на свештениците, ракополагањето на жени како ѓакони засега не е прифатено.
Папата Франциск нагласи дека „прашањето не е доволно созреано“ и дека темата за женскиот дијаконат се разгледува од посебна комисија, која треба да ги презентира своите заклучоци во јуни 2025 година.
Како пример за динамиката на дебатите внатре во Црквата, член 60 од завршниот документ, кој се однесува на иднината на жените, доби најмалку гласови „за,“ со 97 гласа против, што претставува повеќе од една четвртина од учесниците на синодот.
Католичките феминистички движења продолжуваат да вршат притисок врз Ватикан. На 17 октомври, едно од овие движења симболично ракоположи три жени како свештеници на брегот на реката Тибар, блиску до Ватикан, испраќајќи јасна порака за промените кои дел од верниците ги очекуваат.
А.Н.
