Тате МекРеј, 21-годишна канадска пејачка, танчерка и кантавторка, е една од големите ѕвезди на новата генерација поп музика. Тате ја стекна титулата нова поп принцеза благодарение на хитовите кои ги освојуваат топ-листите ширум светот. Иако кариерата ја започна како танчерка, денес е глобална музичка сензација која привлекува милиони обожаватели.
Којa е таа?
Тате Роснер МекРеј е родена на 1 јули 2003 година во Калгари, Канада. Од мали нозе покажувала исклучителен талент за танц, што ја доведе до учество во американското реалити шоу “So You Think You Can Dance” во 2016 година, каде што стана првата Канаѓанка која влегла во финалето.
Откако стекна препознатливост како танчерка, МекРеј почна да објавува оригинални песни и преработки на својот YouTube канал. Нејзиниот дебитантски сингл “One Day” од 2017 година стана вирален, што привлече внимание од дискографската куќа RCA Records, со која потпиша договор во 2019 година.
Во 2020 година го објави својот прв голем хит
Во 2020 година го објави својот прв скратен албум “All the Things I Never Said”, кој го вклучуваше синглот “Stupid”. Вистинскиот пробив на меѓународната сцена го оствари со песната “You Broke Me First” од 2020 година, која стана глобален хит, достигнувајќи топ 10 листи во 13 земји. Нејзиниот дебитантски албум “I Used to Think I Could Fly” од 2022 година го зазеде 13-то место на американската Billboard 200 листа. Албумот донесе хит сингл “She’s All I Wanna Be”, кој во Канада се искачи во топ 10.
Во 2023 година, МекРеј го објави својот втор студиски албум “Think Later”, кој го вклучуваше синглот “Greedy”. Песната постигна голем успех, достигнувајќи прво место во Канада и трето место на Billboard Hot 100 листата во САД.
Вирална е на TikTok
Оваа недела, МекРеј го објави синглот “Sports Car”, трет најавен сингл од претстојниот албум “So Close to What”, чиј излез е планиран за 21 февруари 2025 година. Песната е придружена со визуелно препознатлив видеоспот кој ја прикажува МекРеј во различни модни изданија, нагласувајќи ја нејзината трансформација од “девојка од соседството” во поп ѕвезда. Песната веќе е вирална на TikTok.
С.Н.
