Според извештајот на италијанскиот весник Il Sole 24 Ore, започнати се преговори за потенцијално преземање на познатиот моден бренд Версаче од страна на Прада Група. Овие гласини доаѓаат по неодамнешната одлука на американски суд да го блокира спојувањето на сопственикот на Версаче, Capri Holdings, со компанијата Tapestry, која поседува брендови како Coach и Kate Spade.
Што значи ова за Версаче?
Capri Holdings го ангажираше Barclays за да истражи алтернативни опции, а според извори, еден од нивните предлози е продажба на Версаче на Прада Група. Овој потег би го вклучил Версаче во портфолиото на Прада, кое се покажа како успешно и стабилно дури и во услови на економски пад.
И покрај тоа што Прада и Версаче го делат истото италијанско наследство, нивниот естетски пристап е сосема различен. Версаче е познат по својата екстравагантност и смели дезени, додека Прада се издвојува со минималистичка и елегантна естетика.
Предизвици за Версаче
Финансиските потешкотии за Версаче се очигледни. Во ноември, Capri Holdings објави дека приходите на брендот паднале за 28,2% во вториот квартал од фискалната 2025 година. Ова го става Версаче во незавидна позиција на пазарот, кој сè повеќе го доминираат гиганти како Louis Vuitton и нови играчи како Jacquemus.
Дали Прада ќе успее да го оживее Версаче? Иако оваа аквизиција би можела да донесе нова динамика на модниот пазар, останува да се види дали магијата на Прада може да ја промени судбината на овој легендарен бренд.
А.Н.
