Иако Европа во моментов располага со доволни резерви на природен гас за да ја помине претстојната зима, енергетските аналитичари предупредуваат дека континентот се соочува со многу неизвесна година и жестока конкуренција за набавка на течен природен гас (LNG). Главната причина е прекинот на испораките на руски гас преку Украина, што создаде дополнителен јаз во снабдувањето на европскиот пазар.
Според експертите, Европа ќе мора значително да го зголеми увозот на LNG за да ги надополни резервите пред следната зима. Се проценува дека ќе бидат потребни околу 10 милиони тони дополнителен течен природен гас годишно, што е за околу 10 проценти повеќе од претходната година.
Ова ќе ја стави Европа во директна конкуренција со азиските земји, кои исто така зависат од увоз на LNG. Доколку летото биде особено топло во Азија и побарувачката за енергија порасне, може да дојде до вистинска глобална трка за ограничените количини природен гас, што дополнително ќе ги зголеми цените.
Меѓународната агенција за енергија (IEA) предупредува дека европскиот пазар на гас останува нестабилен. Резервите во складиштата се пониски во споредба со претходните години, а исполнувањето на целите за нивно повторно полнење ќе бара значително поголем увоз. Тоа создава дополнителен притисок врз цените и врз конкурентноста на европската индустрија.
Енергетските аналитичари сметаат дека секое поголемо нарушување на глобалните испораки или нагло зголемување на побарувачката може повторно да предизвика ценовен шок сличен на оној што Европа го доживеа по почетокот на војната во Украина. Поради тоа, земјите од Европската Унија забрзано бараат нови извори на снабдување и вложуваат во обновливи извори на енергија за да ја намалат зависноста од увозниот гас.
Експертите заклучуваат дека следните месеци ќе бидат клучни за европската енергетска безбедност, а исходот ќе зависи од временските услови, глобалната побарувачка и достапноста на LNG на светскиот пазар.
А.Н.
