Познатиот навивач на австралиската фудбалска репрезентација и стенд-ап комичар, Amos Gill, стана вистински хит на социјалните мрежи откако за време на натпревар од Светското првенство ги исмеваше американските навивачи со провокативни песни.
Гил се снимал себеси меѓу навивачите на САД за време на поразот на Австралија од 2:0 во Сиетл минатата сабота. Во видеото објавено на TikTok, кое собра повеќе од 300.000 лајкови, тој пеел песни со кои се потсмева на различни чувствителни теми во американското општество.
Меѓу другото, комичарот го спомнал и озлогласениот финансиски посредник и осуден сексуален престапник Џефри Епстин, пеејќи: „Тој е еден од вас, Џефри Епстин е еден од вас“.
Потоа вниманието го насочил кон честите вооружени напади во американските училишта. На мелодијата на песната „Go West“ од Village People, Гил пеел: „Станете ако вашите училишта се безбедни!“.
Во видеото има и песна посветена на проблемот со дебелината во САД. „Дебели сте и го знаете тоа, дебели сте и го знаете тоа“, пеел комичарот додека бил опкружен со американски навивачи.
Снимката предизвика бројни реакции на социјалните мрежи. Голем дел од коментарите биле позитивни, а многумина ја оцениле шегата како духовита и креативна. Интересно е што меѓу оние што се смееле на видеото имало и Американци.
Ова не е првпат австралиските навивачи да привлечат внимание со провокативни скандирања. Само неколку дена претходно, стотици Австралијци биле снимени на улиците на Ванкувер како пеат песни за Donald Trump по победата на нивната репрезентација над Турција.
Видеата од овие навивачки настапи собраа десетици илјади лајкови и споделувања, дополнително зголемувајќи ја популарноста на Гил и неговите провокативни настапи на Светското првенство.
Ф.С.
