Со почетокот на Светското првенство 2026 завршува и една долга традиција во фудбалската опрема – повеќе нема сите репрезентации спонзорирани од ист производител да изгледаат речиси идентично. Новите дресови за Мундијалот се инспирирани од историјата, културата и идентитетот на секоја земја, па секоја селекција доби уникатен визуелен печат.
Најголемо внимание привлече Adidas, кој ги претстави гостинските дресови за 13 репрезентации. Наместо стандарден шаблон за сите, секој дрес има посебна приказна. Аргентина доби црн дрес инспириран од традиционалната уметност „Филетеадо Портењо“, Јапонија настапува со дизајн што ги симболизира боите на хоризонтот, Белгија му оддава почит на надреалистот René Magritte, додека Мексико ги користи мотивите на древната мајанска архитектура.
Покрај визуелниот идентитет, новите дресови се изработени и со технологија за подобра вентилација и полесно отстранување на потта, што е особено важно со оглед на летните услови во САД, Мексико и Канада, домаќините на првенството.
На Мундијалот ќе настапат 48 репрезентации, а најзастапени производители на опрема се Adidas со 14 селекции, Nike со 12 и Puma со 11 национални тимови. Останатите репрезентации ќе носат дресови од брендови како Kappa, Umbro, Reebok и Kelme.
Светското првенство започнува на 11 јуни и ќе биде најголемото во историјата, но уште пред првиот судиски свиреж стана јасно дека ова ќе биде и Мундијал на кој дресовите конечно ќе раскажуваат приказна – а не само ќе го носат логото на производителот.
Ф.С.
