Во полната сала во општина Ресен на 20 септември премиерно и репризно на 23 септември беше изведена детската аматерска претстава „Шеќерното дете“. Со искрени аплаузи беа поздравени изведбите на претставата во која играат 27 деца, а во адаптација на текст од Даринка Веслиевска според лектирното дело „Шеќерна приказна“ на нашиот познат македонски писател Славко Јаневски.
Режијата е на познатиот поет Сотир Чаушевски и Даринка Веслиевска, сценографијата на Виолета Колодезни, костимографијата на Соња Шикалевска Ангелковски, музиката на Кристијан Милошевски и Тони Карапанчевски Леко, фотографии и видео на Кице Герасовски.
Екипата заедно со децата на возраст од 6-13 годишна возраст со многу посветеност, труд, соработка и пред сѐ љубов, умешно ја оживеаја приказната за Шеќерното дете кое храбро и достоинствено ќе го ослободи славејот од шумските арамии и направија убав спој прикажувајќи ги занаетчиите и нивните занаети. Дечињата и покрај нивното прво искуство глумеа беспрекорно и покрај брзите промени, помалку текст со повеќе движења на сцена, посочи авторката Даринка Веслиевска, која посочи дека ќерката на Славко Јаневски, Јана Јаневска со чие одобрение е подготвена адаптацијата, пред премиерата им посакала успех, среќна дека повторно е оживеано прекрасното дело на нејзиниот татко.
-Уште наредниот ден добивме покани да гостуваме во други градови и да играме на голема сцена. Проектот е од големо значење за нашиот крај за промоција на занаетчиите, децата научија повеќе информации за занаетите дури и изработија магнети кои им беа подарени за спомен. Нашиот град е мал, но со богата традиција и вредности кои благодарение на ваквите проекти може да се покажат на децата кои се најважен фактор во општеството и нашата иднина – вели Даринка Веслиевска.
Покрај детската аматерска претстава имаше и кратка презентација на сите активности од интердисциплинарниот проект „Шеќерното дете и занаетчиите “ кој е финансиски поддржан од Министерството за култура на Р.С.Македонија и просторно од Општина Ресен. Како што посочи проект координаторката м-р Даринка Веслиевска, тој ги вклучува дисциплините: занаетите во минатото и денес, учење занаетчиски занает и едукативни и креативни работилници.
Во делот на занаетите во соработка со здружението „Иднина на традицијата“ и нивните членови Сашко и Гордана Стојаноски се одржаа едукативни работилници под наслов „Занаетите во минатото и денес “ и „Дојди и научи занает“ со акцент на бакрорезот со кој се занимаваат како единствени занаетчии во општина Ресен. На почетокот се одржа и инклузивна работилница „Ајде да играме заедно“ низ интересни игри со цел да се створи емпатија и солидарност кон лицата/децата со попреченост. Оваа работилница ја реализираше М-р по специјална едукација и рехабилитација Дивна Стефановска Симовска. А.Р.
Посетивме неколку занаетчии кои сеуште опстојуваат во нашиот град, топло пречекани бевме и од Моника Ангелевска која е дипломиран дизајнер и има студио за венчаници Монсоло.
Проектот е финансиски поддржан од Министерството за култура а просторно од Општина Ресен и градоначалникот Јован Тозиевски. Голема благодарност до родителите кои соработуваа и помагаа.
