Ако ЕУ успее да вакцинира најмалку 50 проценти од населението во Европа оваа година, може да се врати во нормален живот до крајот на 2021 година, вели еден шеф во ЕМА (Европската агенција за лекови).
Имено, Марко Кавалери, џеф на Одделот за здравствени процедури и стратегии за вакцинација на Европската агенција за лекови, истакна дека ќе мора да научиме да живееме со овој вирус, но дека ќе бидеме позаштитени од него.
Зборувајќи за „Н1“ за најголемите проблеми во Европската унија за спроведување на масовна имунизација, тој ја наведе спорноста во вакцинацијата поради ограничувањата во бројот на дози што се достапни.
-Многу е важно да имате доволно дози за секого, особено за ризичните групи кои треба први да се вакцинираат. Во моментот пристигнуваат нови вакцини, но потребно е време и ќе трае. Иако работите одат побавно, уверени сме дека тоа ќе се подобри во иднина и дека ќе има доволно вакцини за огромното мнозинство граѓани – рече Кавалери.
Според него, вакцинацијата во Европа започнала нешто побавно отколку во Велика Британија, САД и Кина.
-Како и да е, во овој момент работите се одвиваат побрзо и пред да се вакцинираат неколку милиони граѓани, ние мора да направиме напредок во вакцинирањето на постарите групи и оние кои имаат поголем ризик сериозно да се разболат од ковид – рече Кавалери.
Тој оцени дека целта на ЕУ е да ги достигне останатите во процесот на вакцинација, со цел да се овозможи што побрзо враќање во нормалниот живот. Коментирајќи ја можноста за употреба на вакцини од кинески и руски производители во ЕУ, тој изјави дека во тек се преговори со нив, како и дека главното прашање е дали тие вакцини ќе ги исполнуваат условите на европската заедница.
-Ако се случи тоа, би било добро за сите нас, бидејќи би имале нови вакцини за граѓаните на ЕУ, што значително би помогнало во борбата против пандемијата – рече Кавалери.
Од новите видови на коронавирус, тој ги спомена јужноафрикаскиот и бразилскиот како потенцијално најопасни и дека мутациите во тие видови може да го намалат степенот на заштита на вакцините. Кавалери истакна дека мора да се соочиме со разликите во податоците дадени од производителите на вакцини.
-Знаеме дека има проблеми со „АстраЗенека“ и дека нема многу податоци за повеќето вакцини за степенот на заштита кај постарите лица. Но, и покрај сите овие ограничувања, „АстраЗенека“ покажа добра имунолошка реакција кај постарите лица. Тоа е смирувачки и покажува дека реакциите се слични како оние на другите старосни популации“, рече Кавалери.
Тој потсети дека во претходните тестови, РНК вакцините покажале висок степен на заштита, додека другите вакцини покажуваат малку помал степен на заштита, но дека сите вакцини претставуваат добра заштита од тешки состојби на корона и можна хоспитализација. А.Р.
