Се очекува САД, Велика Британија и Европската унија да го потпишат својот прв меѓународен и правно обврзувачки договор за употреба на вештачка интелигенција, објави британскиот весник „Фајненшл тајмс“.
Тројката ќе ја потпише конвенцијата на Советот на Европа за вештачка интелигенција во четврток, објави весникот, додавајќи дека конвенцијата е подготвувана во текот на две години од повеќе од 50 земји, вклучувајќи ги Канада, Израел, Јапонија и Австралија.
САД се „посветени да осигураат дека технологиите за вештачка интелигенција ги почитуваат човековите права и демократските вредности“ и ја истакнуваат „клучната додадена вредност на Советот на Европа во оваа област“, изјави за ФТ висок претставник на администрацијата на американскиот претседател Џозеф Бајден.
„Тоа е прв (договор) со правна тежина на глобално ниво, а исто така обединува многу различни земји“, рече британскиот министер за технологија.
Конвенцијата на Советот на Европа за вештачка интелигенција, која се занимава со човековите права, демократијата и владеењето на правото, беше составена од Комитетот за вештачка интелигенција (ЦАИ). ЦАИ ја финализираше нацрт-конвенцијата во март. После тоа, конвенцијата беше усвоена од Комитетот на министри на Советот на Европа на 17 мај, а ќе може да се потпише во Вилнус на 5 септември.