Во изборните кампањи нема ништо случајно. Слоганите, фотографиите, па дури и бојата на кошулата или фустанот се дел од сценарио создадено да влијае на емоциите на гласачите. Облеката зборува пред кандидатот да каже и еден збор, а бојата е првиот сигнал – симболика која допира до потсвеста и создава впечаток на доверба, борбеност или модерност.
Сината боја – мир и стабилност за „сигурен“ градоначалник
Најчестиот избор оваа кампања. Машките кандидати во Скопје, Битола и Тетово речиси униформно се појавуваат во темно сини костуми и кошули, испраќајќи порака за сигурност, професионалност и „државнички“ пристап. Сината е „безбедна“ – не провоцира и создава впечаток на компетентност. Женските кандидатки што сакаат да изгледаат сериозно и институционално често ја користат темно сината во сакоа или марами за да се доближат до истиот авторитетен изглед, но со мекост во кројот.
Црвената боја – страст и борба за промена
Неколку нови кандидати, особено во Прилеп, Куманово и дел од скопските општини, се појавуваат со црвени детали – вратоврски, фустани или сакоа. Црвената е боја на енергија, борба и директна акција. Женските кандидатки ја користат често во поинтензивни нијанси, комбинирана со бело, за да внесат и топлина, и решителност: порака дека се борци, но и достапни за заедницата.
Зелената боја – прогрес, еколошка свест и нова генерација
Во последниве години зелената е оружје на младите кандидати и активисти. Женските кандидат(к)и избираат зелени марами, сакоа или фустани за да покажат дека се носители на одржливи политики и дека ја носат „новата ера“ во локалното управување. Зелената е особено моќна кај жени кои сакаат да се дистанцираат од старите партии и да изгледаат прогресивно и храбро.
Белата боја – чисти раце и нов почеток
Белата е хит меѓу женските кандидатки. Бел фустан, сако или кошула без многу додатоци е симбол на чесност, транспарентност и нова страница. Жените што се борат да ја скршат перцепцијата за корумпираната политика ја избираат белата за да покажат дека немаат задни намери и дека доаѓаат со „чисти раце“.
Пастелни и земјени тонови – блискост со луѓето
Во руралните општини, женските кандидатки често избираат пастелно розово, беж или кафено за да изгледаат топло и достапно. Тоа е стратегија за да се доближат до секојдневието на гласачите, особено во заедници каде претставата за градоначалник не е строго формална, туку поврзана со доверба и личен контакт.
Во урбаните центри се игра на сигурно со темно сино и црвено, но во малите општини жените донесуваат свеж визуелен јазик – топли тонови, зелени детали и бела како симбол на чесност. Во свет каде фотографиите на социјалните мрежи се главен политички плакат, една добро избрана боја може да направи кандидатката да изгледа доверлива, инспиративна или решителна – уште пред да почне да зборува.
Кампањата не е само зборови, таа е визуелна психологија. А жените, свесно или не, ја користат бојата како суптилно, но моќно оружје за да се издвојат во просторот кој со години бил машки дефиниран.
Н.Доковска
