Тинејџер отворил оган во училиште во југоисточната турска покраина Шанлиурфа, ранувајќи најмалку 16 лица, вклучувајќи ученици и наставници, пред да се самоубие, изјавил гувернерот Хасан Силдак за новинарите во вторник, пренесоа новинските агенции.
Поранешниот ученик, 18, отворил оган со пушка кон учениците и наставниците во средното училиште. Повредените биле итно префрлени во болница во округот Сиверек, рекол Силдак. Дванаесет од ранетите остануваат хоспитализирани.
Мотивот за пукањето сè уште не е јасен.
Младиот човек влегол во училиштето во округот Сиверек во покраината Шанлиурфа рано наутро во вторник и отворил оган неселективно, објави новинската агенција Демироерен.
Претходно, медиумите објавија дека сите ученици биле евакуирани и дека биле распоредени полициски единици за специјални операции откако напаѓачот одбил да се предаде.
„Лицето беше притиснато во зградата преку полициска интервенција и почина откако се застрела“, им рече Силдак на новинарите, додавајќи дека ќе биде спроведена „сеопфатна“ истрага за пукањето, пренесе „Си-ен-ен“.
Видео снимките покажаа десетици ученици како трчаат надвор од училиштето кон портата и на улицата.
