Јапонскиот парламент ја избра ултраконзервативната Санае Такаичи (64) за прва жена премиер во земјата во вторник, еден ден откако нејзината партија постигна коалициски договор со нов партнер, за кој се очекува да го помести владејачкиот блок понадесно.
Такаичи ќе го замени Шигеру Ишиба, со што ќе заврши тримесечниот политички вакуум и внатрешните борби што следеа по катастрофалниот пораз на Либералнодемократската партија (ЛДП) на изборите во јули.
Ишиба, кој беше премиер само една година, поднесе оставка заедно со својот кабинет претходно во текот на денот, отворајќи го патот за неговиот наследник.
Алијансата на ЛДП со десничарската Партија за иновации на Јапонија со седиште во Осака, или Ишин но Каи, го обезбеди нејзиното доаѓање на премиерската функција, бидејќи опозицијата не е обединета.
Алијансата на Такаичи сè уште нема мнозинство во ниту еден дом на парламентот и ќе треба да ги освои другите опозициски групи за да донесе каков било закон, ризик што би можел да ја направи нејзината влада нестабилна или краткотрајна.
„Политичката стабилност е од суштинско значење сега“, рече Такаичи во понеделник на церемонијата на потпишување со лидерот на ЈИП, гувернерот на Осака, Хорофуми Јошимура.
„Без стабилност, не можеме да промовираме мерки за силна економија или дипломатија“, рече таа.
Двете партии потпишаа коалициски договор врз основа на политики што ги истакнуваат тврдокорните, националистички ставови на Такаичи.
Нивниот договор беше постигнат во последен момент откако либералните демократи го загубија својот долгогодишен партнер, поумерената и центристичка Комеито. Раздорот меѓу двете партии се закани да доведе до промена на владата за ЛДП, која владееше со Јапонија речиси непрекинато со децении.
Подоцна денес, 64-годишната Такаичи ќе го претстави кабинетот со голем број сојузници на Таро Асо, највлијателната личност на ЛДП, и други кои ја поддржаа во гласањето за лидерство.
Нема да има министерски места во владата на Такаичи од ЈИП сè додека партијата не биде сигурна во своето партнерство со ЛДП, рече лидерот на партијата Јошимура.
Иако е првата жена што ја извршува функцијата премиер на Јапонија, таа не брзаше да промовира родова еднаквост или разновидност, објавува АП.
Таа е меѓу јапонските политичари кои ги блокираа мерките за унапредување на жените. Таа го поддржува наследувањето на царското семејство само од мажи и се спротивставува на истополовите бракови и дозволувањето посебни презимиња за брачните парови.
Таа е штитеничка на убиениот поранешен премиер Шинзо Абе и се очекува да ги следи неговите политики, вклучувајќи посилна војска и економија и ревизија на пацифистичкиот устав на Јапонија. Со слаба влада, не е јасно колку ќе може да постигне.
