Светската здравствена организација (СЗО) предупредува дека телесното казнување на децата претставува глобален проблем на јавното здравје, кој остава сериозни последици врз физичката и менталната благосостојба на најмладите. Според новиот извештај на организацијата, оваа практика може да влијае врз развојот на децата, да доведе до психолошки нарушувања и дури да зголеми ризик од криминално однесување во зрелоста.
СЗО проценува дека 1,2 милијарди деца ширум светот секоја година се соочуваат со телесно казнување. Истражувањата во 49 земји со низок и среден приход покажуваат дека децата кои биле изложени на вакви форми на дисциплинирање имале 24% помала веројатност да се развиваат правилно во споредба со оние кои не биле физички казнувани.
Само во изминатиот месец, 17% од децата изложени на телесно казнување претрпеле тешки форми на физичко насилство, како удари по главата, лицето или ушите, или силни и повеќекратни удари.
„Денес постојат силни научни докази дека телесното казнување носи повеќекратни ризици за здравјето на децата. Тоа не носи никакви придобивки ниту за однесувањето, ниту за развојот или благосостојбата на децата – ниту пак корист за родителите или за општеството,“ изјави Етиен Круг, директор на одделението на СЗО за здравствени детерминанти, промоција и превенција.
Тој повика оваа „штетна практика да биде укината“ за децата да можат да напредуваат и дома и во училиштата.
Извештајот нагласува дека децата изложени на телесно казнување имаат повисок ризик од анксиозност, депресија, ниска самодоверба и емоционална нестабилност. Овие проблеми често продолжуваат и во возрасниот период, каде што може да доведат до употреба на алкохол и дрога, насилно однесување и дури и самоубиство.
Дополнително, телесното казнување често е проследено со психолошко казнување – однесување кое го понижува, омаловажува, плаши или исмева детето.
СЗО со овој извештај испраќа јасна порака: време е светот да се ослободи од практиките на физичко и психолошко насилство врз децата и да се вложи во позитивни и ненасилни методи на воспитување.
С.Н.
