Во последните месеци од својот живот, папата Франциск ѝ наложи на хуманитарната организација Каритас да го претвори неговиот папамобил во мобилна здравствена станица за деца во Газа. Целта на иницијативата е да се заштитат и почитуваат основните права и достоинство на децата.
На барање на папата Франциск, возилото што се користело за време на неговата посета на Витлеем во 2014 година се дополнува со сè што е потребно за нега на првата линија во воена зона, соопшти добротворната организација „Каритас“, која го надгледува проектот, пренесе РТЦГ.
„Ќе има брзи тестови, комплети за шиење рани, шприцеви, залихи на кислород, вакцини и мал фрижидер за складирање лекови“, се објаснува во соопштението.
Ватикан соопшти дека тоа била „последна желба на папата за децата од Газа“ пред неговата смрт минатиот месец. Возилото моментално е во Витлеем и ќе влезе во Газа ако и кога Израел ќе го отвори хуманитарниот коридор.
Војната меѓу Израел и Хамас во Појасот Газа уби повеќе од 15.000 деца и расели речиси еден милион откако избувна во октомври 2023 година, објави УНИЦЕФ.
Израел го блокираше влегувањето на хуманитарна помош во Појасот Газа повеќе од два месеци, оставајќи „семејства кои се борат да преживеат“ бидејќи храната, чистата вода и лековите достигнаа критично ниско ниво, соопшти агенцијата на ОН за деца.
Засега, Каритас ќе мора да почека додека Израел повторно не го отвори коридорот за помош – но кога тоа ќе се случи, велат дека ќе бидат подготвени.
„Со возилото ќе можеме да стигнеме до децата кои денес немаат пристап до здравствена заштита – деца кои се повредени и неухранети“, изјави Петер Бруне, генерален секретар на Каритас Шведска.
Тим лекари ќе води мобилна клиника, која ќе има капацитети за преглед и лекување на пациенти, а ќе има и наменски возач. Некои детали сè уште се финализираат, како на пример како да се обезбеди возилото од потенцијални експлозии, изјави Бруне за „Би-Би-Си“.
„Тоа не е само возило, туку порака дека светот не ги заборавил децата од Газа“, рече тој.
За време на неговиот понтификат, папата Франциск даде многу страсни коментари за војната во Газа, нарекувајќи ја хуманитарната ситуација во Газа „срамна“. За време на неговиот последен говор за Велигден, тој ги повика сите „завојувани страни“ да се согласат за прекин на огнот и зборуваше за страдањето на Палестинците и Израелците.
Во текот на 18-месечната војна, тој наводно ги повикувал парохијаните во Газа секоја вечер за да провери како се чувствуваат и предложил меѓународната заедница да испита дали израелската воена офанзива во Газа треба да се класифицира како геноцид – тврдење што Израел жестоко го негираше.
Папамобилот е едно од бројните специјално пренаменети возила што му овозможуваат на папата да ги поздравува толпите што се собираат за време на неговите официјални посети. Папата можеше да седи или да стои во возилото додека се движеше, опкружен со безбедносни агенти, а неговиот дизајн им овозможуваше на собраните да имаат јасен поглед на Папата.
Папамобилите во минатото беа изработувани непробојни возила по обидот за атентат врз папата Јован Павле Втори во 1981 година, но Франциско за шпанските медиуми во 2014 година изјави дека не му се допаѓа дизајнот на стаклената „конзерва за сардини“ што го одделува од луѓето.
Во понеделник, израелскиот кабинет за безбедност наводно во принцип одобрил план за продолжување на испораките и дистрибуцијата на хуманитарна помош преку приватни компании, но ОН и другите агенции за помош изјавија дека предлогот би ги прекршил основните хуманитарни принципи и дека нема да соработуваат. Т.Р.
