Турција повторно ја потврди својата позиција како една од најпосакуваните туристички дестинации во светот, постигнувајќи историски резултати во туризмот.
Во 2024 година, земјата угостила импресивни 62.269.890 посетители, што претставува раст од 9,8% во однос на претходната година и дури 20,3% повеќе во споредба со 2019 година, последната година пред пандемијата.
Претходно поставените цели од 60 милиони посетители се надминати, а новиот праг од 61 милион, најавен во октомври 2024 година, исто така е достигнат. Покрај тоа, приходите од туризмот достигнале 61,1 милијарда американски долари, што е зголемување од 8,3% во однос на претходната година. Овие резултати ја прават 2024 година најуспешната во историјата на турскиот туризам.
Најголемиот број туристи и натаму пристигнуваат од Европа, Блискиот Исток и Централна Азија, додека пазарите во развој – како Америка, Индија и Кина – бележат значителен раст. Русија, Германија и Обединетото Кралство остануваат трите водечки пазари, додека бројот на туристи од САД се зголемил за 8,1%, од Кина за 65,1%, а од Индија за 20,7%.
Просечното времетраење на престојот на меѓународните туристи во Турција изнесувало 10,7 дена, додека приходот по посетител достигнал 972 американски долари. Според податоците на UN Tourism, Турција во 2023 година се најде меѓу петте најпосетени дестинации во светот, а рекордните резултати во 2024 година дополнително го зацврстуваат нејзиниот статус како глобален туристички лидер.
Ф.С.